Бүгүн Хаҥалас Хоточчутун оскуолата 90 сылын бэлиэтиир

Ааптар: 
Бөлөххө киир:

Бүгүн Хаҥалас улууһун Хоточчу сүрүн орто оскуолата  90 сыллаах үбүлүөйүн бэлиэтиир.

edersaas.ru

Сыстыганнаах дьаҥ турбут кэмэ буолан, бары тэрээһиннэр куйаар ситиминэн буола тураллар.

Хоточчу оскуолатын устуоруйатын туһунан бибилэтиэкэр Лира Яндреева кэпсиир:

1930 с. күһүн 2-с Нөөрүктээйи нэһилиэгэр Филипп Мушников-Кылар кинээс дьиэтигэр бастакы 4 кылаастаах оскуола аһыллыбыта. Бастаан дьиэ Тиэрбэс диэн сиргэ турбут, онтон Бүөтүр Егоров, Лэгэнтэй Петров туруорсууларынан 2-с Нөөрүктээйигэ оскуола дьиэтин көһөрөн аҕалбыттар.
1954 с. холхуостары холбоон, сопхуостары бөдөҥсүтэр кэмнэригэр Василий Матвеев, Павел Дмитриев, Афанасий Федоров оскуоланы көтүрэн, үстүү атынан маһын состорон, хаста да кырынан, оскуола дьиэтин Хоточчуга аҕалбыттар. Оскуоланы  Яковлев (1-Дьөппөн), Новгородов диэн уоллуун моһуонун уларытан туппуттар.

Оскуоланы батыһан, оҕолорун чугас үөрэттэрээри, Нөөрүктээйи ыаллара Хоточчуга көһөн киирбиттэр.
1986 с. саҥа оскуола дьиэтэ үлэҕэ киирбитэ. 1989 с. 9 кылаастаах оскуола аһыллыбыта. 2009 сыллаахха оскуола-оҕо саада статустаммыта.  Билигин учууталлары уонна техүлэһити кытта холбоон кэлэктиипкэ 36 киһи үлэлиир.

Оскуоланы сүүрбэттэн тахса сыл Римма Слепцова дириэктэрдээн салайан кэллэ. Оскуола  15 учууталлыттан 13-һэ — үрдүк үөрэхтээх, 2 учуутал РФ уопсай үөрэхтээһин бочуоттаах үлэһиттэрэ, 2 учуутал СӨ үөрэхтээһинин туйгуна, 3 педагог «Учууталлар учууталлара» бочуоттаах ааттаахтар.
Оскуолабыт учууталлара, үлэһиттэрэ аныгы тэтиминэн ыччакка билиини, үөрэҕи, сайдыыны биэрэргэ кыһаллан үлэлииллэр. Оскуолбыт кэлэктиибин дьоһуннаах үбүлүөйдэринэн эҕэрдэлиибит! 

Елена ПОТОЦКАЯ, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0