Саха сирин норуотун тапталлаах ырыаһыта Галина Шахурдина бүгүн, тохсунньу 25 күнүгэр, 75 сааһын томточчу туолла.
Кини 1947 сыллаахха тохсунньу 25 күнүгэр Мэҥэ Хаҥалас Төҥүлүтүгэр күн сирин көрбүтэ. Түгэнинэн туһанан, «РИИХ Сахамедиа» кэлэктиибин аатыттан ис-сүрэхпититтэн эҕэрдэлиибит!
ЫСПЫРААПКА:
1965 сыллаахха Улан Удэҕэ Илин-Сибиирдээҕи култуура институтугар үөрэнэ киирбитэ.
1969-1976 сс. мууусука учууталынан үлэлээбитэ.
1971 сыллаахха В.Габышев тылларыгар норуот тапталын ылбыт “Балыктаах киэһэтэ” диэн ырыатын айбыта.
Галина Шахурдина И. Алексеев, И. Федосеев, М. Куличкина, И. Артамонов, Н. Дьяконов, А. Акимов, В.Сивцев, Н. Харлампьева, С. Гольдерова, К. Уткин, С. Спиридонова хоһоонноругар элбэх ырыаны айда.
КӨҤҮЛЛЭЭ
/Ырыаһыт Г.Н.Шахурдинаҕа ананар/
Толору мустубут саалаҕа
Чуумпура сэгэйбит көрөөччү
Ытыһын тыаһыгар уйдаран
Таҕыста сыанаҕа Галина.
Таҕыста сахабыт Далбара,
Таҕыста тапталы туойаары
Сааһырбыт, хаҕырбыт сүрэххэ
Ааспыты, буолбуту саната.
Хатыҥнаах чараҥҥа хаамтарда,
Туруйа ырыатын санатта,
Эдэркээн кэмнэргэ эргиттэ,
Сүрэҕи, дууһаны долгутта.
Куоластыын, көстүүлүүн тупсаҕай
Дьиҥ чахчы норуоппут таптала
Ытыспыт тыаһыгар уйдаран
Ыллаа дуу, олор дуу уһуннук!
Дууһалаах, иһирэх ырыаны
Элбэҕи эн бэлэх ууннаҕыҥ,
Аны дуу истээччиҥ эйгэтэ
Көҥүллээ эйиигин туойарын.
Полина-Победа, Уус Алдан