Быйыл Үөһээ Бүлүүгэ Ийэ тыл сыла биллэрилиннэ

Бөлөххө киир:

Үөһээ Бүлүү 1935 сыл олунньу 10 күнүгэр Бүлүүттэн арахсан, туспа улуус  буолбута. Онон олунньу 10 күнэ Үөһээ Бүлүү улууһун төрөөбүт күнүнэн ааҕыллар.  Бүгүн, олунньу 10 күнүгэр, улуус үрдүнэн үүммүт сыл Ийэ тыл сылынан биллэрилиннэ. 

Үөһээ Бүлүү улууһун баһылыга Владимир Поскачин: «Ытыктабыллаах  Үөһээ Бүлүү улууһун олохтоохторун барыгытын улууспут төрөөбүт күнүнэн итиитик-истиҥник эҕэрдэлиибин. Быйылгы сылы улууспутугар Ийэ тыл сылынан биллэрэбин. Мантан инньэ улууспут иһигэр төрөөбүт төрүт тылынан саҥарыы, сахалыы таҥаһы кэтии, төрүт култуураны сайыннарыы, тарҕатыы ураты болҕомтоҕо ылыллыаҕа. Улууска тахсар докумуоннар сахалыы тылынан суруллуохтара. Саха төрүт тылын сайыннарыыга күүскэ ылсан үлэлээбит, тыл үөрэхтээҕэ Михаил Алексеев — Дапсы дьиэтэ тутуллуоҕа»,  — диэн эҕэрдэ тылы эттэ.

Санатар буоллахха, Үөһээ Бүлүү Саха сирин хотугулуу-арҕаа эҥээригэр Дьокуускай куораттан сиринэн 677, салгынынан 610, уунан 847 килэмиэтир тэйиччи сытар, 42 тыһ. кв. км иэннээх сирдээх-уоттаах, сүөһү-сылгы иитиитинэн утумнаахтык дьарыктанар улууһунан буолар.

Үөһээ Бүлүү 87 сыл устатыгар бигэ олохтоох-дьаһахтаах, интеллектуальнай-духуобунай баайдаах биир биллэр-көстөр улуус буола сайынна. Баараҕай таас тутуулар, бөҕө оҥоһуулаах суоллар, аспааллаах уулуссалар, Чыбыыда таас муостата, гаас оттук, суотабай сибээс, түргэн интэриниэт барыта – улуус сайдыытын туоһулууллар.

Сотору кэминэн Бүлүү эбэни туоруур муоста тутуллуо. “Үс хоһууннаах” үөһээ бүлүүлэр 2017 сыллаахха Манчаары оонньууларын үрдүк таһымнаахтык тэрийэн ыыппыттара. Быйыл өрөспүүбүлүкэбит төрүттэммитэ 100 сылын туоларыгар аналлаах Олоҥхо ыһыаҕа буолуоҕа. 2023 сылга саха уһулуччулаах уолун, Саха АССР Совнаркомун бастакы бэрэссэдээтэлин, учуонай-экэнэмиис Исидор Барахов төрөөбүтэ 125 сылын өрө көтөҕүллэн туран бэлиэтиэхпит.

 

Александр Тарасов, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0