Бүгүн, бэс ыйын 19 күнүгэр, Үөһээ Бүлүүгэ Олоҥхо ыһыаҕар биир ураты тэрээһининэн 100 ат сэлэлээн хаамыыта буолла. Бу биир күннээх тэрээһин буолбатах.
Бу туһунан «Үрүҥ ат» диэн улуус сылгыһыттарын ассоциациятын салайааччыта Яна Иванова: «Үөһээ Бүлүү сылгыһыттарын 1-кы параада Улуу Кыайыы 75 сылын бэлиэтээн, 2020 сыллаахха кулун тутар 27 күнүгэр ыытыллыбыта. Кэлиҥҥи сылларга оҕолор акка сыстан эрэллэрин бэлиэтиир тоҕоостоох. Ол курдук, Тамалакаантан 15 саастаах Арылхан Саввинов 12 саастаах быраатын Виталий Егоровы кытта сэлэлээн хаамыыга кыттыыны ыллылар. Уолаттары аҕалара Александр Саввинов күүскэ дьарыктыыр. 9 саастаах Эрчим Кривошапкины эһэтэ Николай Попов дьарыктыыр. Кыргыттар да эр дьонтон хаалсыбаттар. Харбалаахтан 15 саастаах Екатерина Семенова, Оҥхойтон саас ортолоох Екатерина Николаева өрүү инники күөҥҥэ сылдьаллар.
Семенова Катяны эһэтэ Ибрагим Николаев дьарыктыыр. Оҕолор үһүс сылларын сэлэлээн хаамыыга кытталлар. 2 тыһ. солк. бириэмийэнэн наҕараадаламмыттара. Быйыл Балаҕаннаахтан Прокопьевтар дьиэ кэргэнинэн кытта сылдьаллар», — диэн кэпсээтэ.
Санатар буоллахха, 2019 сыллаахха өрөспүүбүлүкэтээҕи сылгы күрэҕэр улахан мунньах буолбут. Онно улуус 100-тэн тахса сылгыһыта «Үрүҥ ат» ассоциациятын тэринэргэ быһаарыы ылыммыттар. Салайааччынан «Сахаагроплем» ГБУ хаан уларытар отдел салайааччытын талбыттар. Салайааччы бэлиэтииринэн, Үөһээ Бүлүү улууһун баһылыга Владимир Поскачин өйөбүлүнэн уонна тыа хаһаайыстыбатын управлениетын салайааччы Сергей Иванов көҕүлээһининэн, улуус сылгыһыттарыгар сүүс ыҥыыры аҕалан, үөрүүлээх быһыыга-майгыга туттарбыттар.
Ити курдук, Үөһээ Бүлүү сылгыһыттара быйылгы Олоҥхо ыһыаҕар өйтөн-санааттан сүппэт биир улахан чаҕылхай тэрээһини тэрийдилэр.
Үөһээ Бүлүүттэн Елена ПОТОЦКАЯ, «Саха сирэ» хаһыат
Салгыы видео-устууну көрүҥ.