«Пиэрибэй Маай куолаһынан» биллэр Эдуард Рудых бүгүн – сынньанар күнэ.
edersaas.ru
СӨ култууратын үтүөлээх үлэһитэ, Саха араадьыйатын уонна тэлэбиидэнньэтин «көмүс куолаһа» Эдуард Рудых сааскы сырдык бырааһынньыгы — 1 Маайы аҕалар «бастакы хараҥаччы» быһыытынан, үлэтин 90-с сылларга саҕалаабыта.
— Онтон ыла, 1 Маайга үлэм сарсыарда лоп курдук 9 чаастан саҕаланара номнуо 25 сыл буола охсубут! 10 см халыҥнаах A-4 кумааҕыга сценарий туттаран кэбиһэллэр. Ону бастаан утаа Сардаана Федоровалыын иккиэн эрэ түөрт чааһы быһа тохтообокко ааҕан, күөмэйбит бүтэ сыһара. Аны көннөрү аахпаккын, өрө күүрүүлээхтик ааҕыаххын наада. Ол куоласкар ноҕорууска буоллаҕа. Хата, кэлиҥҥи сылларга төрдүө буолан, абыраммыппыт.
Бастаан сылааска оптуобус иһигэр олорон ааҕар этибит. Ол эрээри, холуонналар уларыйан хааллахтарына, көрбөккө хаалыахха сөп. Онон болуоссат саамай көстөр сиригэр үрдүк мас тырыбынаҕа олордуттара. Биллэн турар, түөт чааһы быһа олордоххо, тымныы. Онон кыһыҥҥылыы таҥнан кэлэбит. Бэйэбитин кытта тиэрмэскэ итии чэйдээх буолабыт. Уонна хайаан да, күөмэйбит куурбатын диэн, уу наада буолар, — диэн кэпсиир диктор.
Эдуард Рудыхтан: «Бу күннэргэ эйиигин дьон «COVID-19 куолаһа» диэн ааттыыр буоллулар. «Кини тэлэбиисэргэ көһүннэҕинэ, араадьыайҕа коронавирус туһунан кэпсээтэҕинэ, куттанан хайдах да буолуохпун билбэппин…» диэн социальнай ситимнэргэ суруйаллар. Онуоха эн санааҥ?» — диэн ыйыппыппар маннык хадарда:
— Мин онтон өһүргэммэппин. Идэм оннук буоллаҕа. Араас суолталаах иһитиннэриилэри биэрии – мин эбээһинэһим. Бу тиэмэҕэ итинник дикциялаахтык саҥарыы — ирдэбилэ оннук. Оччоҕо эрэ дьон санаатыгар, толкуйугар иҥэр буоллаҕа дии. Хомойуох иһин, араас хайысхаҕа итинник күүстээх сэрэтии үлэ бара турарын үрдүнэн, үгүс дьон билигин да сыстыганнаах дьаҥ олус кутталлааҕын улахаҥҥа уурбаттар. Дьиэҕэ олоруу – мээнэ ирдэбил буолбатах. Бу, бастатан туран, ыарахан ыарыыттан харыстаныы биир сүрүн көрүҥэ. Онон мин куолаһым бу уустук кэмҥэ таһырдьа тахсыыны бохсор буоллаҕына, бэрт буолуо этэ.
… Бүгүн 1 Маай бырааһынньыгар Эдуард Рудых 35 сыл тухары аан бастакытын дьиэтигэр олорон сынньанар!
— Бырааһынньыгынан сибээстээн бэйэм фирменнэй бүлүүдэбин астаан, дьиэлээхтэрбин үөрдүөм. Аармыйаҕа сылдьан пуобар этим дии. Онтон кинигэ ааҕыам, сөбүлүүр киинэлэрбин көрүөм. Дьиэбэр олорон дьэ сынньаныам. Дьиҥэр, бырааһынньык диэн бу буоллаҕа – дууһа нус-хас туруга… — диэн санаатын үллэстэр бары билэр дикторбыт, «Саха» НКИХ тутаах суруналыыһа Эдуард Рудых.
Эдуард Егоровичка сааскы бырааһынньыгынан итии-истиҥ эҕэрдэбитин тиэрдэбит! Өрүү бүгүҥҥүҥ курдук күлэ-үөрэ сырыт. Көмүс куоласкынан олохпут үөрүүлээх эрэ түгэннэрин кэпсии-ипсии, сырдата сырыт!
Елена ПОТОЦКАЯ, «Cаха сирэ» хаһыат, edersaas.ru