Ойуур баһаарын бохсууга үлэлиир өрөспүүбүлүкэтээҕи суһал ыстаап салайааччыта СӨ бырабыыталыстыбатын бэрэссэдээтэлин бастакы солбуйааччы Дмитрий Садовников куйаар ситиминэн бүгүн сарсыарда уочараттаах мунньаҕын ыытта.
Ааспыт сууккаҕа:
- 17 279,3 га иэннээх 13 баһаар умуруорулунна.
- 62 038,0 га иэннээх 7 баһаар салгыы тэнийиитэ бохсулунна.
- 307,5 га иэннээх 9 саҥа ойуур баһаара күөдьүйдэ.
СӨ ЫБММ Кылаабынай управлениетын салайааччыта Павел Гарин иһитиннэрбитинэн, тэрилтэ исписэлиистэрэ саамай тыҥааһыннаах балаһыанньалаах Нам, Томпо, Таатта, Горнай, Үөһээ Бүлүү, Уус Алдан уонна Мииринэй улуустарыгар үлэлииллэр.
Дьокуускайга Ногинскайдааҕы быыһыыр сулууспа үлэһиттэрин бастакы эшелона кэллэ. Кинилэри Таастаахха ыыттылар. Бүгүн кэлэр Ногинскай иккис эшелона уонна Тулатааҕы быыһаачылар кииннэрэ Горнай, Хаҥалас уонна Чурапчы улуустарыгар барыахтара. Күн дьыл туругуттан көрөн, Улахан Эбэ, Харыйалаах, Фрунзе, Далыр, Кырыкый, Сайылык баһаардарыгар Арассыыйатааҕы ЫБММ управлениетын авиацията туһаныллыаҕа.
Елена ПОТОЦКАЯ, «Саха сирэ» хаһыат.