Бүгүн, муус устар 13 күнүгэр, киэһэ Д.К. Сивцев – Суорун Омоллоон аатынан опера уонна балет тыйаатырыгар биллиилээх композитордар Марк Жирков уонна Генрих Литинскэй «Сыгый Кырынаастыыр» опералара буолуоҕа. Саамай хайҕаллааҕа диэн, Бүлүү улууһун художественнай кэлэктииптэрин уонна С.А. Зверев – Кыыл Уолун аатынан Национальнай үҥкүү тыйаатырын күүстэринэн туруоруллар. Бырайыак Саха АССР тэриллибитэ 100 уонна Саха сирин бастакы композитора Марк Жирков төрөөбүтэ 130 сылларыгар аналлаах.
Кылаабынай дирижер Николая Петров этэринэн, опера муусукатын национальнай үнүстүрүмүөннэргэ оркестра доҕуһуоллуур. Бу иннинэ опера муус устар 10 күнүгэр Бүлүү куоракка Култуура киинин уораҕайыгар туруоруллубута. Култуура киинин дириэктэрэ Алена Дашевская бэлиэтээн эппитинэн, операҕа 150 киһи кыттарыттан 105-һэ Бүлүү улууһун нэһилиэктэриттэн анаан-минээн киирбиттэр. Бүлүү искусствотын оскуолатын педагога, уруккута опера тыйаатырын солиһа Маргарита Лукина самодеятельнай ырыаһыттар куоластарын туруоран биэрбит.
Сүрүн оруолу — Сыгый Кырынаастыыры — Салтанат Маччаева, Нарыйа Николаева уонна Дэгэнэ Дугуйу Василий Николаев толороллор. Салгыы опера муус устар 27 күнүгэр Москва куоракка П.И.Чайковскай аатынан консерватория саалатыгар туруоруллуоҕа. Санатар буоллахха, Марк Жирков бу оператын 1947 сыллаахха айбыта.