Бүгүн Дьокуускайга Олимпийскай чөмпүйүөн Аделина Сотникова маастар-кылаас ыытыаҕа

Сочитааҕы Олимпиада кыайыылааҕа хаҥкыһыт Аделина Сотникова Дьокуускайга маастар-кылаас ыытыаҕа. Тэрээһин MUUS uSTAR ыччат бэстибээлин иитинэн ыытыллар. Ыҥырыылаах ыалдьыт бүгүн Саха сиригэр көтөн кэллэ.

Арассыыйа успуордун үтүөлээх маастара бэстибээл ыалдьыттарын кытта бүгүн Дьокуускайга «Эллэй Боотур» дыбарыаска 15:00 чааска көрсүөҕэ. Манна Аделина Сотникова успуорка уопутун, Олимпиадаҕа хардыыларын, бэйэтэ баһылаабыт тиэхиньикэтин уонна фигурнай хаҥкылааһын аан дойдутааҕы быраактыкатыттан техническэй элэмиэннэри оҥорон көрдөрүөҕэ.

Маастар-кылааска кыттыан баҕалаахтар rssszvs@gov.ru диэн электроннай аадырыска толору ааккытын-суолгутун уонна тоҕо көрсүһүүгэ кыттыаххытын баҕараргытын ыйан  сайаапкалаһыаххытын сөп. Маастар-кылааска тэрийээччилэртэн бигэргэтиилээх эрэ дьон кыттар бырааптаах.

Хаартыска: aif.ru