Бүгүн, сэтинньи 1 күнүгэр, Дьокуускайга А.Е. Кулаковскай аатынан норуоттар доҕордоһууларын дьиэтигэр «Улахан этнографическай диктант» суруйдулар. Бу туһунан биһиэхэ пресс-сулууспаттан иһитиннэрдилэр.
—Бүгүн Дьокуускай куорат 60 олохтооҕо Арассыыйа норуоттарын култуураларын, үгэстэрин төһө билэллэрин бэрэбиэркэлэннилэр. Тэрээһин кыттыылаахтарын норуоттар доҕордоһууларын дьиэтин генеральнай дириэктэрин бастакы солбуйааччы Розалия Колосова эҕэрдэлээтэ:
—Этнографическай диктант хас биирдии норуоттар култуураларын харыстыырга, норуоттар икки ардыларынааҕы сыһыаны бөҕөргөтөргө, иллээхтик-эйэлээхтик сомоҕолоһон олороллоругар туһуланан ыытыллар. Сорудах отут ыйытыылаах. Итинтэн уон ыйытыыга эрэгийэннэр уратылара учуоттанар. Диктаҥҥа бука барыларыгар биир тэҥ таһымнаах сорудахтар бэриллэллэр. 45 мүнүүтэ суруйаллар. Бары сорудаҕы сөпкө толорбут киһи 100 баалы ылар.
СӨ Тас сибээскэ уонна норуоттар дьыалаларыгар миниистири бастакы солбуйааччы Владимир Васильев диктант ыйытыылара киэҥ хабааннаахтарын бэлиэтиир:
— Сыл ахсын сорудах уустугуран уонна ордук интэриэһинэй буолан иһэр. Ыйытыыларга киһи Арассыыйа норуоттарын үгэстэрин, култуураларын билэр эрэ буоллаҕына хоруйдуур кыахтаах. Ол иһин, хас биирдии киһи билиитин-көрүүтүн хаҥатарга кыһаллара, элбэҕи ааҕара ирдэнэр. Манна даҕатан эттэххэ, Саха сирэ дойду субъектарыгар диктаны суруйар былаһаакканы тэрийиигэ бастыҥнарга киирэр. Холобур, былырыын өрөспүүбүлүкэҕэ 230 былаһаакка тэриллибит буоллаҕына, быйыл 300-тэн тахса сиргэ тэрээһин ыытыллар. Дьэ онон, хаачыстыбалаах уонна сөптөөх эппиэттэр элбэх буолалларыгар баҕарабын, — диэтэ.
Аахсыйа бары кыттыылаахтарыгар, устудьуоннарга , национальнай-култуурунай түмсүүлэр бэрэстэбиитэллэригэр сэртипикээттэр туттарылыннылар. Оттон сөптөөх хоруй www.miretno.ru саайтка сэтинньи 10 күнүгэр тахсыаҕа. Диктаҥҥа кыттыбыт дьоннор түмүктэрэ ахсынньы 12 күнүгэр биллиэҕэ.
Хаартыскаларга Айталина Аргунова түһэриилэрэ.