Бүгүн «Чыпчаал» киинэ үлэһиттэрин бириэмийэлэрин туттарыы тэрээһинэ буолар

Ааптар: 
Бөлөххө киир:

Ахсынньы 21 күнүгэр Арассыыйа кинематографистарын сойууһун Саха сиринээҕи салаата уонна “Сахафильм” хампаанньа “Чыпчаал” национальнай киинэ бирииһин туттарыы иккис церемониятын ыытар. Быйыл бириис 11 номинацияҕа туттарыллар.

Маҥнайгы церемония 2019 сылга 8 номинациялаах ыытыллыбыта. “Бастыҥ актер”, “Бастыҥ актриса” уо.д.а. үгэс быһыытынан туттарыллар бириистэри кытта атын эрэгийиэннэри кытыннарар “Арассыыйа бастыҥ эрэгийиэннээҕи киинэтэ” диэн номинация баар, онно быйыл Хакасия, Башкортостан, Татарстан уонна Бурятия киинэлэрэ күрэхтэһэллэр.

Быйыл күрэх кыайыылаахтарын Казахстантан, Узбекистантан, Москвттан, Чукоткаттан уонна Саха сириттэн хомуллубут киинэ профессионаллара талыахтара. Ол эрэн, кэлэр өттүгэр номинаннары атын киинэ форумнарыгар курдук академия чилиэннэрэ куоластаан талар буолуохтара. Саха сиригэр киинэ үрдүк академияларын чилиэннэрэ бааллар — 5 киһи Азия-Тиихэй акыйаан академиятын уонна 2 киһи Арассыыйа «Золотой орёл» уонна «Ника» киноакадемияларын чилиэттэрэ. Манна олоҕуран Хотугулуу-Азия киинэ искусствотын Академиятын тэрийэргэ быһаарыныы ылыллыбыт, бу көҕүлээһини Саха Өрөспүүбүлүкэтин баһылыга Айсен Николаев өйүүрүн биллэрбит. Бу быһаарыныыны хас да дойду уонна Арассыыйа эрэгийиэннэрин киинэ диэйэтэллэрэ биһирииллэрин уонна көҕүлээһиҥҥэ кыттыһалларын биллэрбиттэр.

Быйылгы “Чыпчаал” бириис чэрчитинэн “Кыһыҥҥы киинэ оскуолата” ыытыллыаҕа, манна эдэр уонна үлэлии сылдьар киинэ үлэһиттэригэр анаан лиэксийэлэр ааҕыллыахтара.

«Чыпчаал” бириис статуэтката сыаналаах металлтан кутуллубут, 2 киилэ ыйааһыннаах. Статуэткаҕа хайа үрдүгэр турар, айар күүһү биэрэр сырдык күүһү, күнү уруйдуур киһи хоһуйуллубут. Бириэмийэ туттарыыта Дьокуускайга “Лена” киинэ тыйаатырыгар ыытыллар.

«Саха сирэ» хаһыат, edersaas.ru

СИА хаартыската (2019 сыллааҕы номинация)

 

+1
0
+1
0
+1
0
+1
0
+1
0
+1
0
+1
0