Бүгүн Чурапчы улууһун Кытаанах нэһилиэгэр ураты долгутуулаах күн буолла. Биллиилээх тюрколог, РСФСР наукатын үтүөлээх диэйэтэлэ, тыл үөрэҕин билимнэрин дуоктара Евдокия Иннокентьевна Коркина быйыл төрөөбүтэ 100 сааһын туолар үбүлүөйдээх сылынан, олоро сылдьыбыт Көчүктэй алааһыгар Мэҥэ тааһы туруордулар.
Өйдөбүнньүк бэлиэ аһыллыытын долгутуулаах кэрэ-бэлиэ түгэнигэр нэһилиэк олохтоохторо муһуннулар. Үтүөкэн киһи туһунан истиҥник ахтан-санаан аастылар.
Олоҕун олуктара
Евдокия Иннокентьевна Чурапчы Кытаанаҕар 1917 с. ахсынньы 17 күнүгэр төрөөбүт. Кытаанах икки кылаастаах оскуолатын биир сылынан үөрэнэн бүтэрбит. Чурапчытааҕы холкуостаах ыччат оскуолатыгар алтыс кылааска үөрэнэ сырыттаҕына, кулаак кыыһа диэн үөрэҕиттэн ууратан кэбиспиттэр. Билиигэ-көрүүгэ тардыһар кыысчаан үтүө дьон көмөтүнэн Дьокуускайга киирэн үөрэҕин салҕаабыт. Куоракка сэттэ кылааһы бүтэрэн баран, салгыы Дьокуускайдааҕы тыа хаһаайыстыбатын техникумугар сири таҥыы салаатыгар үөрэммит. Ол кэнниттэн Мэҥэ Хаҥаласка землеустроителинэн үлэлээбит.
Эдэр киһи үөрэххэ, сырдыкка тардыһан, 1939 сыллаахха Москубаҕа Н.Г.Чернышевскай аатынан философия, литература, история институтугар туттарсан киирбит. Ол үөрэнэ сырыттаҕына, 1941 сыллаахха уоттаах сэрии саҕаланан, институт сабыллар. Онон дойдутугар төннөргө күһэллэр. Е.И.Коркина 1954 с. диэри комсомолга уонна административнай үлэҕэ сылдьар. ЫБСЛКС Саха сиринээҕи Обкомун сэкирэтээринэн, Дьокуускай куорат горисполкомун бэрэссэдээтэлин солбуйааччынан, Үөрэх миниистирин солбуйааччынан туох баар кыһамньытын ууран үлэлиир. Бу сылларга кэтэхтэн пединститут историяҕа бакылтыатын үөрэнэн бүтэрэр. 1960 сыллаахха кини «Формы прошедшего времени в якутском языке” диэн темаҕа кандидатскай диссертациятын көмүскүүр. Бу үлэтэ дойду уонна кыраныысса таһын ориенталистарын биһирэбилин ылбыт монографиятыгар киирбит, ол монографиятынан тыл үөрэҕин билимнэрин докторын учуонай аатын көмүскээбит. Саха дьахталларыттан бастакы тыл үөрэҕин билимнэрин дуоктара буолар.
1963-1984 сс. Е.И.Коркина ССРС НА Сибиирдээҕи салаатын Саха сиринээҕи тыл, литература, история институтун салайбыт. 2009 с. бэс ыйын 10 күнүгэр күн сириттэн бар,sn/
Биһиги корр.