Ил Дархан Айсен Николаев бүгүн бэйэтин инстаграмыгар чэгиэн, чөл олоҕу тутуһар дьону Хаамыы уонна чэбдигирдэр сүүрүү национальнай күнүнэн эҕэрдэлээтэ.
«Саха сирин бастакы бэрэсидьиэнэ Михаил Николаев көҕүлээһининэн 20-тэн тахса сыл өрөспүүбүлүкэбитигэр Доруобуйаны бөҕөргөтөр сүүрүү уонна хаамыы күнэ бэлиэтэнэр. Киһи кэрэхсиэҕэ, бу күн Аан дойдутааҕы скандинавскай хаамыы күнүн кытта сөп түбэһэр. Манан сиэттэрэн,
хаалыктаах хаамыыны пропагандалыыр «Сканди» бөлөҕү бэлиэтиир тоҕоостоох. Манна кыратыттан улаханыгар диэри араас саастаах дьон дьарыктанар. Бу хамсааһыны төрүттээбит Ольга уонна Матвей Лыткиннар саҥаттан саҥа дьону бэйэлэригэр тардан, өрөспүүбүлүкэ үрдүнэн кэккэлэрэ хаҥаан иһэр.
Кулууп саамай саастаах чилиэнэ Матрена Андреевна Алексеева 80 саастаах! Өрүү хаалыктаах хаамар буолан, Матрена Андреевнаҕа бэйэтин сааһын биэрбэккин. Спорду, чэгиэн олоҕу таптааччылары
бүгүҥҥү Хаамыы уонна чэбдигирдэр сүүрүү национальнай күнүнэн итиитик-истиҥник эҕэрдэлиибин! Эһиэхэ чэгиэн олоҕу тутуһаргыт уонна өрөспүүбүлүкэҕэ спорт сайдыытыгар дьоһун уонна кылааккытын киллэрэргит иһин барҕа махталбын тиэрдэбин!», — диэн Ил Дархан суруйда.
Елена ПОТОЦКАЯ, «Саха сирэ» хаһыат, edersaas.ru