Бүгүн — Былатыан Ойуунускай төрөөбүтэ 128 сыла

Ааптар: 
Бөлөххө киир:

Саах сыбахтаах саха балаҕана. Көмүлүөк оһох күлүбүрэччи умайа турар. Ол сырдыгар көрдөххө: ыас хара баттаҕын мөлбөччү өрүммүт саха номоҕон кыыһа кинигэ ааҕа олорор. Кини ааҕарын балаҕан иһигэр баар дьон бука бары — улаханныын — кыралыын иһийэн олорон истэллэр…

Ол кыһыҥҥы киэһэттэн ыла алта уон икки өксүөннээх — силлиэлээх кыһыннар, сандаарар саһарҕалаах саастар, долгуйар күөхтэрдээх сайыннар, көмүс ардахтаах күһүннэр аастылар.Ол мөлбөйбүт кыыс аата Устинья Захарова диэн этэ. Кини билигин суох. Ол оннугар кини туһунан кэрэ өйдөбүл баар — мин сүрэхпэр. Тоҕо диэтэргит, кини мин Ойуунускайбын миэхэ арыйбыта! Ол ааспыт кыһыҥҥы уһун киэһэлэргэ, көмүлүөк оһох иннигэр олорон мин аан бастаан билбитим, истибитим улуу убайбыт Ойуунускай өлбөт — сүппэт айымньыларын: «Кыһыл ойууну», «Улуу Кудаҥсаны», «Дойду оҕото Дорлгуунап Ньукулайы», «Иирбит Ньукууһу», «Дьулуруйар Ньургун Боотуру»!

Мин Ойуунускайым — сахаттан саарыннара, киһиттэн килбиэннээхтэрэ, урааҥхайтан улуулара.

Мин Ойуунускайым — өркөн өй үрдүк өрөгөйө, уран тыл умсулҕаннаах ууһа, охсуһуулаах үйэ хомпоруун хотойо, Сэбиэт былааһын төлөннөөх ырыаһыта, көмүскэс санаалаах күн киһитэ!

Күн — дьыл аастаҕын аайы кини сырдык мөссүөнэ өссө чаҕылыйар, кини » кэхтибэт кэрэкэ тыллара» өссө илбиһирэр, кини кынаттаах ыра санаа өссө үрдүккэ кыырайар.

Быдан дьыллар үрдүк мындааларыттан, ааспыт кэмнэр уорааннаах улаҕаларыттан дуораһыйар курдуктар убай киһибит Былатыан Ойуунускай сурдурҕаччы суруйбут илбистээх тыллара:

Үс саха төрүөҕэр
Үөрүүлээх күнүгэр
Мин ырыам ылланыа,
Мин аатым ааттаныа!

Мин, ырыаҕа ылламмыт хоһооҥҥо холбоммут Лэбийэ алаас кыыһа, өрөгөй сааспар 21 — с үйэҕэ үктэммит дьоллоох саха дьахтара, уран тыл маастара Ойуунускай убайбар сүһүөхтээх бэйэм сүгүрүйэбин, хоолдьуктаах бэйэм хоҥкуйабын!

Махтал эйиэхэ, мин Ойуунускайым, сахаҥ тылын аан дойдуга таһаарбыккар, улуу омуктары умсугуппуккар!

Сыллар ааһыахтара, үйэлэр солбуһуохтара, ол эрэн, кэлэр кэм сахалара киэн тутта, дуораһыта — доллоһута эн ырыаларгын ыллыахтара, эн тойуктаргын туойуохтара, эн олоҥхоҕун онолутуохтара! Истэҕин дуо, мин Ойуунускайым, ол хайаан даҕаны туолуоҕа!

Елена Прокопьева , РФ суруналыыстарын сойууһун чилиэнэ.

+1
0
+1
0
+1
0
+1
0
+1
0
+1
0
+1
0