РФ бырабыыталыстыбатын сорудаҕынан РФ Тыатын хаһаайыстыбатын министиэристибэтэ 2014 с. бэс ыйын 11 күнүгэр Бэтэринээрийэ үлэһитин күнүн сыл аайы атырдьах ыйын 31 күнүгэр олохтуур туһунан бирикээс таһаарбыта. Ол күн быйыл чэппиэргэ түбэстэ.
Манна тоҕооһуннаран эттэххэ, быйыл Саха сиригэр бэтэринээрийэ сулууспата төрүттэммитэ 120 сылын туолла. СӨ бырабыыталыстыбатын бэрэссэдээтэлин бастакы солбуйааччы-экономика миниистирэ Алексей Стручков бырабыыталыстыбаттан уонна тус бэйэтин аатыттан бу үөрүүлээх күҥҥэ бэтэринээрийэ медицинскэй сулууспатын үлэһиттэригэр уонна бэтэрээннэригэр итии-истиҥ эҕэрдэтин ыытар.
“Эһиги сулууспаҕыт суолтатын дириҥник көрөр буоллахха, бөдөҥ академик Константин Скрябин киһи аймах байылыаттык, дьоллоохтук олороругар бэтэринээрийэ сүҥкэн оруоллааҕын ыйбытын санаабат буолуохха сатаммат, — диир Алексей Александрович. – Күннэтэ кыыл-сүөл чэгиэн буолуутун хааччыйарга сыралаһан, хас биирдии киһиттэн, ыалтан саҕалаан бүтүн бөһүөлэктэри, куораттары ыарыыттан-сүтүүттэн араҥаччылыыгыт. Саха сиригэр 1897 с. соҕотох бэтэринээр-быраас үлэлээбит буоллаҕына, бүгүн хас биирдии нэһилиэккэ көрүллэр исписэлиистэн саҕалаан наукаҕа тиийэ сулууспа ситэн-сайдан кэллэ. Күндү бэтэринээрийэ үлэһиттэрэ уонна бэтэрээннэрэ, эһиги бэриниилээх үлэҕит түмүгэр Саха сиригэр эпизоотическай быһыы-майгы бигэ туруктааҕын бэлиэтээн итиэннэ өрөспүүбүлүкэбит социальнай-экономическай сайдыытыгар дьоһун кылааккыт иһин махтанан туран, киһи аймаҕы араҥаччылыыр үлэҕитигэр өссө үрдүк ситиһиилэри, тус олоххутугар дьолу-соргуну баҕарабын!”
Василий НИКИФОРОВ, “Саха сирэ” хаһыат, edersaas.ru