Ыам ыйын 25 күнэ — Саха сиригэр “Бүтэһик чуораан” ыытыллар күнэ. РФ Үөрэҕириигэ министиэристибэтин сүбэтинэн, хотугу уонна Арктика улуустарыттан ураты улуустарга тэрээһиннэр онлайнынан бараллар диэн СӨ Үөрэҕин уонна наукатын министиэристибэтин саайтыгар суруллар.
Бу күн оскуоланы бүтэрээччилэри “Саха” НКИХ, “Тэтим” араадьыйа нөҥүө эҕэрдэлиэхтэрэ. Хас биирдии Саха сирин олохтооҕо олох киэҥ аартыгар үктэнэр ыччаты инстаграм нөҥүө видеонан эҕэрдэлиэн сөп. Ол инниттэн бүгүн #ПоследнийзвонокЯкутия хештегтаах челлендж таһаарыахха сөп.
Арассыыйа үөрэнээччилэрин хамсааһынын Саха сиринээҕи көхтөөх кыттааччылара уонна лиидэрдэрэ #рдшсаха #колокольчикРДШ #удачивыпускник диэн хештегтаах “Колокольчик РДШ” өрөспүүбүлүкэтээҕи онлайн-флешмобу тэрийиэхтэрэ.
Онтон РФ Үөрэҕириигэ министиэристибэтэ устудьуоннар тэлэбиидэнньэлэрин норуоттар икки ардыларынааҕы ассоциациятын уонна Арассыыйатааҕы үөрэнээччилэр хамсааһыннарын кытта Бүтүн Арассыыйатааҕы “Последний зонок-2020” тэрээһини ыытар.
10 чаастан (Москва бириэмэтинэн) РФ Үөрэҕириигэ министиэристибэтин “ВКонтакте” социальнай ситимигэр, оскуоланы бүтэрээччилэри дойду бары эрэгийиэннэриттэн педагогтар уонна үөрэнээччилэр марафоннара күүтэр. Тэрээһини РФ Үөрэҕириигэ миниистирэ Сергей Кравцов саҕалыаҕа.
edersaas.ru
Хаартыска — СИА архыыбыттан.