Арассыыйаҕа бу бэлиэ күн 2007 сылтан бэлиэтэнэр.
Таатта улууһугар Ытык-Күѳлгэ хаан донордара уонна быар донордара аҕыйаҕа суохтар. Кинилэр бары олус сэмэй дьон. Бүгүн, донор күнүнэн, эдьиийдии-балыстыы Светлана Неустроева, Элеонора Маркова санааларын үллэстэллэригэр көрдөстүм.
—Балтым Элеонора ыалдьан ѳр кэмҥэ эмтэммитэ. Кэлин эмтиир бырааспыт доруобай быары олордорго сүбэлээбитэ. Оччолорго маннык эпэрээссийэни оҥоруу ньымата саҥа киирэн эрэр кэмэ этэ. Мин интэриниэтинэн араас саайтары хаһыспытым, дьоннорбутун кытта сүбэлэһэн, хайдах буолуой, хайдах дьайыай, туох түмүгү биэриэй диэн, о.д.а. ыйытыыларга балачча толкуйга түспүппүт. Оччолорго, куттанан да буоллаҕа, утарааччы да элбэх курдуга. Ол да буоллар, боруобалаан көрөргө быһаарыммыппыт.
Дьолго мин быарым балтым быарыгар сѳп түбэспитэ. Дьэ, бу кэмтэн ыла харчы булар аатыгар барбыппыт. Итиннэ бар дьоммутугар улахан да улахан махталлаахпыт. Кинилэр өйөөбүттэригэр, көмөлөспүттэригэр үйэбит-сааспыт тухары сүһүөхтээх бэйэбит сүгүрүйэн, хоолдьуктаах бэйэбит хоҥкуйан махтана туруохпут. Мындыр өбүгэлэрбит «ойуурдаах куобах охтубат, дьонноох киһи тутайбат» диэн мээнэҕэ эппэтэхтэр эбит. Биһигини эпэрээссийэ кэнниттэн кэргэним уонна балтыбыт Аня Неустроева көрөн—истэн улахан күүһү-көмөнү оҥорбуттара. Барыта этэҥҥэ ааспыта. Билигин этэҥҥэ үлэлии-хамсыы сылдьабыт. Балтым Элеонора дьонун-сэргэтин кытта этэҥҥэ сылдьарыттан, үлэ-олох үөһүгэр көхтөөхтүк кыттарыттан үөрүүбүт муҥура суох, — диэтэ эдьиийэ Светлана.
Оттон балта маннык кэпсээтэ:
—Эдьиийим олох үѳс-батааска биэрбэтэҕэ. Кум-хам тутан, Москваҕа биирдэ баар буола түспүтүм. Светам кэргэнэ, күтүѳтүм, биһигини арыаллаан барсыбыта. Ол иһин, уоскуйбутум, санаам бөҕөхсүйбүтэ. Өй-санаа өртүнэн реабилитацияланыы наһаа улахан суолталаах буолар эбит. Билигин маннык эпэрээссийэ элбээн иһэр. Түгэнинэн туһанан, сайдыылаах мэдиссиинэ үрүҥ халааттаах аанньаларыгар, быраастарга, орто дойду олоҕор иккис тыыны биэрбит күндүттэн күндү эдьиийбэр тус бэйэм уонна оҕолорум, дьиэ кэргэним, чугас дьонум ааттарыттан улахан да улахан махталбын тиэрдэбин.
Билигин биһиги Саха сиригэр «Донор info» диэн батсаап группалаахпыт, инстаграм сирэйдээхпит. Онно санааларбытын үллэстэбит. Маннык эпэрээссийэни барыахтаах дьоҥҥо сүбэ-ама да бэрсэбит. Маны таһынан, сѳптѳѳхтүк аһааһын, физическэй ноҕорууска туһунан кэпсэтэбит, ырытыһабыт. Биир ѳлүүлээх дьон форум ыытаары сылдьыбыппыт коронавирус дьаҥа туран мэһэйдээтэ. Барыта этэҥҥэ аастаҕына, тэрээһиммитин оҥорор соруктаахпыт.
Бар дьоҥҥо этэҥҥэ чэгиэн буолалларыгар баҕарабыт. Уһун дьоллоох олохтонуҥ, — диэтилэр Светланалаах Элеонора.
Хаартыска: С.Неустроева, Э.Маркова дьиэтээҕи альбомнарыттан