Анестезиолог-реаниматологтар ыарыһаҕы утутуу (наркоз) кэмигэр кини организма айгыраабатыгар, анестезины куттала суох биэрэргэ, эпэрээссийэ туох да содула суох ааһарыгар уо.д.а. эппиэттииллэр. Эпэрээссийэ кэмигэр сүрэх, мэйии, бүөр уо.д.а. уорганнар үлэлэрин хонтуруоллууллар, салайан биэрэллэр уо.д.а.
edersaas.ru
Өрөспүүбүлүкэтээҕи 2 №-дээх балыыһа интенсивнэй терапиялаах анестезиология уонна реанимация отделениетын сэбиэдиссэйэ Александра Золотарева:
– Биһиги быраастарбыт бары анестезиолог-реаниматолог идэлээхтэр. Ити икки идэ хайдах да тус-туспа араарыллыбат. Анестезиолог-реаниматолог – сүрүн үлэһит. Хирурдар уустук эпэрээссийэни ситиһиилээхтик оҥороллоругар биһиги көмөбүт олус улахан. Ыарыһах эпэрээссийэ бириэмэтигэр ханнык да ыарыыны билбэтин туһугар үлэлиибит. Онон, хирурдар биһиги көмөбүтүнэн уустук эпэрээссийэлэри оҥороллор. Хирурдар да, анестезиологтар да быстыспат ситимнээхтэр.
Холобур, эпэрээссийэ кэмигэр хаан кутуута, ыарыһаҕы наркоз көмөтүнэн утутуу, ол кэмҥэ кини аппараатынан тыынарын хааччыйыы уо.д.а. – анестезиолог-реаниматолог эбээһинэһэ.
Анестезиолог-реаниматолог ханнык баҕарар ыксаллаах кэмҥэ, миэстэтигэр сөптөөх дьайыыны түргэнник оҥорор (реакция) дьоҕурдаах, элбэх билиилээх буолуохтаах. Биһиги балыыһабыт ыарыһахтарыгар «көмүс чаас», «көмүс мүнүүтэ» диэн өйдөбүллэр улахан суолталаахтар, элбэҕи быһаараллар. Ити «сыаналаах» мүнүүтэлэри аһардыбыт да, өлүү-сүтүү да тахсыан сөп. Онон, хас биирдии мүнүүтэ күндү.
Надежда ЕГОРОВА, «Саха сирэ» хаһыат, edersaas.ru
Сүрүн хаартыска интэриниэттэн ылылынна