Бүгүн РСФСР уонна ССРС норуодунай артыыһа, М.И.Глинка аатынан РСФСР Судаарыстыбаннай бириэмийэтин лауреата, Саха сиригэр опера искусствота сайдарын туһугар элбэх кылаатын киллэрбит Анегина Ильина төрөөбүт күнэ. Түгэнинэн туһанан, «РИИХ Сахамедиа” АУо кэлэктиибин аатыттан итии-истиҥ эҕэрдэбитин тиэрдэбит.
Олоҕун олуктара
1943 сыллаахха олунньу 3 күнүгэр Үөһээ Бүлүү улууһун Дүллүкү нэһилиэгэр төрөөбүтэ.
1957 сыллаахха сэттэ кылаастаах оскуоланы бүтэрэн баран, Дьокуускайдааҕы педучилище музыкальнай салаатыгар киирбит.
1959 с. өрөспүүбүлүкэтээҕи ыччат бэстибээлигэр кыттыбыт. Онно кини толоруутугар хас да ырыаны истэн баран, Москватааҕы Чайковскай аатынан консерватория проректора М.Н.Анастасьев Москвалыырга сүбэлээбит. Онон 16 саастаах кыыс Москва консерваториятын музыкальнай училищетыгар педагог О.П.Померанцева вокал кылааһыгар киирбит. Түөрт сылынан туйгуннук бүтэрэн профессор А. А. Соловьеваҕа вокалга уонна пианистка В. Я. Шубинаҕа үөрэммит.
1967 с. Аан дойдутааҕы «Пражская весна» куонкуруска кыттан иккис истиэпэннээх диплом уонна үрүҥ көмүс мэтээл ылбыт.
1968 Москубатааҕы консерваторияны (Н.Л.Дорлиак кылааһа) бүтэрбит, ол сылтан Саха музыкальнай театрын солистката. 1968 с. Киев куоракка Аан дойдутааҕы камернай толорооччулар куонкурустарын лауреатын аатын ылбыт. 1971 с. Мюнхеҥҥа Аан дойдутааҕы вокалистар куонкурустарыгар бастакы бириэмийэ лауреата.
1969 сылтан — Саха государственнай музыкальнай-драматическай театрын прима-солистката.
1971 сылтан — Саха музыкальнай театрын солистката.
1991 сылтан — опера уонна балет Саха Государственнай театрыгар опернай сцена маастара.
Операҕа толорбут меццо-сопрано партиялара
- Ольга (дебют, А. И. Егорова)
- Туйаарыма Куо («Ньургун Боотур» М. Жирков, Г. Литинскэй)
- Кармен («Кармен» Ж. Бизе)
- Розина («Севильский цирюльник» Дж. Россини)
- Кончаковна («Князь Игорь» А. Бородин)
- Княгиня («Русалка» А. Даргомыжскай)
- Графиня («Пиковая дама» П. Чайковскай)
- Азучена («Трубадур» Дж. Верди)
- Кюбэйик («Колыбельная» З. Степанов)
- Саргы Сахадова (В.Кац монооперата «Возвращение»)
- Сардаана, Нагная, Алгыма («Лоокуут уонна Ньургуһун» Г. Григорян)
Сахалыы бикипиэдьийэттэн.