Саха уола, 125 киилэҕэ тустар Айаал Лазарев Токиотааҕы Олимпиадаҕа Кыргызстан хамаандатыттан кыттар.
XXXII сайыҥҥы Олимпийскай оонньуу саха дьоно бары даҕаны долгуйа кэтэһэр-манаһар көрүҥмүтүгэр, көҥүл тустууга, күрэхтэһиитэ атырдьах ыйын 4-7 күннэригэр буола турар. Хас ыйааһын ахсын уон алталыы бөҕөс, Аан дойдуттан талыллыбыт, чулууттан чулуу бухатыырдар, күөн көрсөллөр. Ол иһигэр Амма уола Айаал Лазарев муҥутуур ыарахан ыйааһыҥҥа, этэргэ дылы сири сиҥнэрэр бухатыырдар ыйааһыннарыгар, тустар.
Айаал Лазарев ыйааһыныгар, 125 киилэҕэ, тустааччылар бэҕэһээ, ол эбэтэр атырдьах ыйын 4 күнүгэр, сэрэбиэйдэһэн, ким кими кытары тустарын быһаарыстылар. Айаал Лазарев американец Гейбл Стивесонныын тустар буолла. Оттон бүгүн саамай быһаарыылаах, эппиэттээх күн! Сарсыарда өттүгэр, 9:15 чаастан 9:45 чааска диэри, бөҕөстөр бастакы ыйааһыннаныылара буолар. Күнүс 11:00 чаастан барыллааһын хапсыһыыларга, киэһэ 18:15 чаастан финалга киирэр иһин хапсыһыыларга киирсэллэр.
Сарсын сарсыарда 9:00 чаастан иккис ыйааһыннаныылара буолар. Күнүс 11:00 чаастан – «уоскутар» бөлөх тустуута. Дьэ онтон киэһэ 19:30 чаастан – ФИНАЛ!
Токио бириэмэтэ Дьокуускай бириэмэтигэр үүт-маас сөп түбэһэр, онон үөһэ этиллибит кэмнэргэ Саха сирин олохтоохторо бука бары «күөх экран» иннигэр олороммут оҕобут, уолбут, бухатыырбыт аан дойдуттан хомуллан кэлбит ааттаах-суолллаах бөҕөстөрү кытары тустарын көрүөҕүҥ. Ситиһиилээх буоларын туһугар ыалдьыаҕыҥ.
Раиса Сибирякова, «Саха сирэ» edersaas.ru