Алтынньы 6 күнүнээҕи туругунан, Саха сиригэр 97 киһи коронавируһунан ыарыйда. Ол иһигэр, Дьокуускайга – 58 киһи. Өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрбитинэн, эпидемиологическай балаһыанньа уустугуран иһэр.
Мэҥэ Хаҥаласка 6 киһи ыалдьыбыт. Ольга Валерьевна Таатта улууһун Уус Таатта нэһилиэгэр ыарыы тарҕаммытын туһунан эттэ. Биир ыалдьыбыт киһи кэлэн, элбэх ыалы сутуйбут. Онон Таатта улууһунааҕы суһал ыстаап ыарыы тарҕамматын туһугар миэрэлэри ылынар. Эдьигээҥҥэ үөрэх кыһатын үлэтин тохтотон баран, оҕолору дьиэттэн үөрэтиигэ көһөрөр туһунан быһаарыныыны суһал ыстаап бүгүн эбиэт кэнниттэн муньаҕар ылыныаҕа.
Хас улуус аайы биирдиилээн ыалдьыы түбэлтэтэ тахсар. Ону тарҕаппакка, суһаллык быһаарыныы ылына охсор эрэйиллэр. Хас улуус аайы инфекционнай стационардар бааллар, ону таһынан, сорох нэһилиэктэргэ инфекционнай куойкалары арыйарга күһэлиннибит диэн Ольга Балабкина кэпсээтэ.
Ангелина Васильева, «Саха сирэ» хаһыат, edersaas.ru