Айылҕа харыстабыла Сүрүн

Бүгүн 2 амфибия-сөмөлүөт үлэлиэҕэ

Ойуур баһаардарын бүгүҥҥү уустук балаһыанньатыгар 2 тыһыынча кэриҥэ киһи уоту охсуһа сылдьар. 200-тэн тахса тиэхиникэ, ону таһынан, ардаҕы аҕалар, ууну кутар сөмөлүөттэр, бөртөлүөттэр үлэлииллэр. Ааспыт нэдиэлэҕэ авиатиэхиникэ сүрүннээн арҕааҥы улуустарга үлэлээбитэ.

От ыйын 19 күнүгэр өрөспүүбүлүкэҕэ 216 ойуур баһаара баар, ол онтон 68-һын умуллара сылдьаллар диэн бырабыытлаыстыба бэрэссэдээтэлин бастакы солбуйааччы Дмитрий Садовников иһитиннэрдэ. Суукка иһигэр 10 баһаары умулларбыттар, ол эрээри 9 баһаар саҥа күөдьүйэн тахсыбыт. Атын эрэгийиэннэртэн кэлэн, 700-тэн тахса киһи үлэлиир.

Билигин болҕомто Горнай улууһун Маҕарас, Кэптин, Дьиикимдэ нэһилиэктэрин, Сунтаар улууһун Кэмпэндээйитин, Нам улууһун Салбаҥын аттыларыгар турбут ойуур баһаардарын умуруорууга ууруллар.

— Ил Дархан уонна Ыксаллаах быһыы-майгы министиэристибэтэ бииргэ үлэлээһиннэрин түмүгэр, бүгүн икки “Бе-200” амфибия-сөмөлүөттэр кэлэн ууну кутуохтара. Ону тэҥэ, 8 бөртөлүөт араас учаастактарга, ардаҕы аҕалар зондировщик сөмөлүөт үлэлиэхтэрэ, — диэн Дмитрий Садовников брифинг кэмигэр бэлиэтээн эттэ.

Ангелина Васильева, “Саха сирэ” хаһыат, edersaas.ru

Хаартыска: Мария Васильева, СИА.

0
0