Өрөспүүбүлүкэ суһал ыстаабын салайааччытын солбуйааччы Ольга Балабкина уочараттаах брифинин ыытта.
Сүрүн болҕмтону аан дойдуну аймаабыт дьаҥ Саха сиригэр хайдах хаптайан эрэригэр туһаайда. Киһи доруобуйата туохтааҕар да күндүтүн быһыытынан, хас киһи үтүөрбүтүн эттэ. Ол курдук, бүгүн 126 киһи үтүөрбүт. Ити ыарыы саҕаланыаҕыттан улахан көрдөрүү. Оттон уопсайынан ыллахха, 1411 киһи бу ыарахан дьаҥтан үтүөрбүтэ бэлиэтэммит. Ол да буоллар, ыарахан туруктаах дьон баар. Бүгүҥҥү күҥҥэ 13 киһи ыарахан туруктаах, кинилэртэн 3-һэ аппараакка холбоммут. Ольга Балабкина үтүөрэллэригэр баҕа санаатын тириэртэ.
Салгыы Ольга Валерьевна быраастар ыарыһахтары ыарахан туруктан таһаарарга ис сүрэхтэриттэн кыһаллан үлэлииллэрин бэлиэтээтэ. Маныаха стационардар суолталара олус улахан. Ол курдук, Ленскэйгэ, Мэҥэ Хаҥаласка, Намҥа, Бүлүүгэ, Өлүөхүмэҕэ, Горнайга уо.д.а стационардар муҥутуур кыахтарын туһанан үлэлээбиттэр. Маннык үлэ Аммаҕа күүтэр. Бу стационардарга дьаҥ кэмигэр улахан ноҕорууска сүктэриллибит.
ИФА-ҕа, антитела-ҕа тест оҥоруу үлэтэ салгыы ыытыллар. Онон сибээстээн, дьону маннык бэрэбиэркэни ааһалларыгар ыҥырда.
Түмүгэр, Ил Дархан Айсен Николаев бүгүҥ эппитин курдук, ыарыы салгыы тарҕамматын, улааппатын туһугар үлэ ыытыллар диэтэ. Ордук улахан болҕомто оскуоланы бүтэрээччилэргэ, эксээмэн туттарааччыларга ууруллуохтааҕын ыйда.
Женни СТРЮКОВА, “Саха сирэ” хаһыат
Хаартыска: архыып