Бүгүҥҥү күн бырааһа

Уус Алдантан Полина Находкина-Полина Победа Медиссиинэ үлэһиттэрин күнүнэн саҥа хоһоонун бэлэх уунар.

edersaas.ru

/Пандемия кэмигэр үлэлии сылдьар быраастарга ананар/

Утуйбатах харахтар,
Ураты да туруктар,
Салгын киирбэт таҥастаах,
Ачыкылаах, мааскалаах.
Бүгүҥҥү күн бырааһа,
Халаата суох аанньалбыт.

Хаарыан маҥан халаата
Өйдөбүнньүк буоллаҕа,
Көҥүл тыыммыт салгынын
Мааска нөҥүө тыыннаҕа.
Бүгүҥҥү күн бырааһа
Халаата суох аанньалбыт.

Ыйы ыйдаан дьоннорун
Көрбөтүлэр быраастар,
Күнү-түүнү үргүлдьү
Охсустулар вирустуун.
Бүгүҥҥү күн бырааһа
Халаата суох аанньалбыт.

Бары тэҥҥэ ылсыһан
Охсуһуоҕуҥ вирустуун,
Ааспыт кэммит эргиллэн
Быраас кэтиэ халаатын.
Сарсыҥҥы күн бырааһа
Үрүҥ халаат аанньалбыт

Полина-Победа
Уус-Алдан
20.06.2020с.