Коронавируһунан сибээстээн, мааска туһунан үгүс кэпсэтии тахсар, сорохтор туһалаабат дэһэллэр, хармааннарын хаҥатынар да дьон бааллар.
Ол эрээри, барар сирбит баҕана үүтэ, кэлэр сирбит кэлии үүтэ буолбут бүгүҥҥү курдук балаһыанньаҕа, мааска эрэ абырыыр кыахтаах. Хайдах?
Бастатан туран, Арассыыйаҕа коронавируһунан ыалдьыбыт дьон 43 бырыһыана ыарыы сибикитин билбэтэхтэр диэн бэлиэтииллэр. Ити аата, бэйэлэрэ даҕаны билбэттэринэн, дьону сутуйа сылдьаллар. Дьэ, маннык дьон атыттарга сыһыарбаттарын туһугар мааска кэтэллэрэ булгуччулаах. Ол эбэтэр, сөтөллөр, ытырдар түгэннэригэр ыарыы мааскаҕа хааларын курдук.
Иккиһинэн, ыалдьыбат дьон мааска кэтэн харыстанар. Букатын мааската суох сылдьыахтааҕар син хас эрэ бырыһыана көмүскүүр кыахтаах.
Үсүһүнэн, ыалдьыбыт уонна ыалдьыбатах дьон иккиэн мааска кэтэр түгэннэригэр, ыалдьыбатах киһи икки маасканан кэриэтэ харыстанар. Онон уопсастыбаннай миэстэҕэ, тырааныспарка, маҕаһыыннарга, аптекаларга, о.д.а. элбэх киһи баар сиригэр мааска кэтэр булгуччулаах.
Мааска туһалаабат үһү эҥин диэн кэпсэтиилэр бааллар. Биллэн турар, маасканы сөпкө кэтэр ирдэнэр. Өскөтүн, маасканан айаҕы эрэ сабар, мурун аһаҕас түгэнигэр ыарыыттан харыстыыра саарбах. Онон айах, мурун барыта сабыылаах буолуохтаах. Уонна маасканы, сирэйи илиинэн таарыйыллыа суохтаах. Хайаан даҕаны 2 чаас буола-буола уларытыллыахтаах диэн этэллэр. Онон сөпкө кэттэххэ туһалыыр кыахтаах.
Киһи доруобуйатын, чугас дьонун туһугар бэйэтэ эрэ кыһалыннаҕына табыллар. Ким даҕаны, атын киһи кэлэн көмөлөһөр кыаҕа суох.
Людмила ПОПОВА, «Саха сирэ» хаһыат, edersaas.ru
Хаартыска: «Кэрэ» ателье