Массыына өрүһү туорууругар туоннатыттан көрөн хааччахтааһыны муус устар 4 күнүттэн киллэриэхтэрэ.
Тырааныспар уонна суол хаһаайыстыбатын миниистирэ Владимир Сивцев иһитиннэрбитинэн, былырыын кыһыҥҥы суол арыый эрдэ сабыллыбыт эбит буоллаҕына, быйыл суол уонна халлаан туругуттан көрөн, хааччахтары сыыйа киллэрэн иһиэхтэрэ. Суол үлэһиттэрэ бүгүҥҥүттэн саҕалаан муус халыҥын күннэтэ мээрэйдииллэр.
Быһа холоон бу ый ортото киин улуустарга кыһыҥҥы суол-сырыы уонна өрүһү туорааһыннар сабыллыахтара. Арктикаҕа уонна хотугу оройуоннарга итини муус устар 20-25 күннэригэр былаанныыллар.
Манна даҕатан эттэххэ, Ил Дархан Айсен Николаев суол сабыллыар диэри ыраах сытар уонна суола-ииһэ суох нэһилиэнньэлээх пуунннары аһынан-үөлүнэн, бастакы уочарат туттуллар тустаах табаарынан толору хааччыйарга сорудахтаабыта.
СӨ Тырааныспар уонна суол хаһаайыстыбатын миниистиэристибэтин пресс-сулууспата