Доруобуйа Сүрүн Уопсастыба

Бүгүҥҥэттэн бастакы уонна көһөрүллэ сылдьар офтальмологическай комплекс үлэлээтэ

Ил Дархан Айсен Николаев бүгүн өрөспүүбүлүкэтээҕи офтальмологическай балыыһаҕа көһө сылдьар офтальмологическай комплекс күлүүһүн үөрүүлээх быһыыга-майгыга туттарда. 

«Бүгүҥҥү тэрээһин Саха сирин доруобуйатын харыстабылыгар биир бэлиэ, ураты сабыытыйанан буолар, ол курдук, офтальмология сулууспатыгар анал оборудованиенан толору хааччыллыбыт  көһө сылдьар комплекс үлэҕэ киирдэ. Манна харах ыарыытын эрэ быһаарбакка, кэккэ эпэрээссийэлэр ыытыллар кыахтаахтар», — диэн  Айсен Николаев быһаарда.

Санатар буоллахха,  Ил Дархан быһаччы сорудаҕынан «Биир ньыгыл Арассыыйа» баартыйа  «Здоровое будущее» диэн бырайыагынан  бу мэдиссииинискэй комплекс үлэлээн эрэр. Анал кэбиниэккэ хараҕы көрүөхтэрэ, киһиэхэ ханнык ачыкы сөп түбэһэрин быһаарыахтара уонна лазернай эпэрээссийэлэри оҥоруохтара. Комплекс ыраах сытар нэһилиэктэргэ тиийэн үлэлиэҕэ.

«Биһиги бары Саха сиригэр өрөспүүбүлүкэтээҕи офтальмологическай балыыһа кэлиҥҥи кэмҥэ сөптөөх суолунан сайдан иһэрин көрө-билэ сылдьабыт. Кэлэктиип оройуоннарга сылдьан тустаах көмөнү оҥороро элбээтэ. Оттон бу саҥа комплекс үлэҕэ киириитэ офтальмологическай көмө атын таһымҥа тахсарын хааччыйыаҕа. Кыраапык быһыытынан ыраах сытар нэһилиэнньэлээх пууннарга үлэлиэҕэ. Ол быһыытынан  бастакы уочаратынан Нам улууһун Хатырыгар тиийиэҕэ », — диэн Айсен Сергеевич санаатын үллэһиннэ.

Айсен Николаев  офтальмологическай балыыһа стационарнай отделениетыгар уонна глаукомнай кэбиниэттэргэ сырытта, ону тэҥэ, үрдүк технология көмөтүнэн этэҥҥэ эпэрээссийэлэнэн дьиэлэригэр тахсыахтаах оҕолору кытта көрүстэ, кэпсэттэ. Виктория диэн бастакы пациенка икки хараҕар эпэрээссийэ оҥорбуттар, бүгүн сиигин уһуллулар. Кырачаан Игнат барыта этэҥҥэ ааһан, сүүрэ сылдьар, оттон Ньургуйаана ачыкытын устубут уонна остуол оонньуутун оонньуур. Төрөппүттэр оҕолоро Дьокуускайга бары өттүнэн сөптөөх мэдиссиинискэй көмөнү ылбыттарытта  үөрүүлэрэ муҥура суох. Санатар буоллахха, тустаах комплекс  КАМАЗ баазатыгар оҥоһуллубут. Онон комплекс хайа баҕарар улууска ыраах сытар нэһилиэктэргэ тиийэр кыахтаах.

Хаартыска — Мария Васильева (СИА)

 

 

0
0
Telegram @edersaas20