«Бүддьүөттэн биир да кэпиэйкэ «Визит-Киини» тутууга көрүллэ илик. «Стройкон» ХЭУо куонкуруһу кыайан баран, бэйэтин суотугар дьиэни-уоту, суолу-ииһи туппута. Онон билигин урбаанньыт 107 мөл. солк. бүтүн тиһиги атыылаһарга этии киллэрдэ», – диэн айдааннаах «Лямпушка» кордонугар сырыытын кэнниттэн суруналыыстары кытары көрсүһүүгэ Ил Түмэн дьокутаата Виктор Федоров иһитиннэрдэ.
Быһаарыы: «Уус Бүлүүтээҕи» айылҕа паарката 1997 сыллаахха ыам ыйын 15 күнүгэр СӨ уурааҕынан тэриллибитэ. Айылҕа паарката Кэбээйи улууһугар, Сангаартан 120 килэмиэтирдээх сиргэ баар. Уопсай иэнэ – 1 016 000 га. Манна балык 26, көтөр 163 көрүҥэ, итиэннэ тайах, таба, бүүчээн, тыатааҕы, бөрө, саһыл, кырынаас, киис, солоҥдо, сиэгэн, тииҥ, куобах, андаатар бааллар.
Уус Бүлүүтээҕи айылҕа пааркатыгар баар «Визит-Кииҥҥэ» 37 мөл. солкуобай оннугар 107 мөл. солк. үп-харчы судаарыстыбаннай бүддьүөттэн көрүллүөхтээҕин туһунан кэпсэтии улахан айдааны таһаарбыта. «Чунуобунньуктар хонор-өрүүр сирдэригэр сүүһүнэн мөлүйүөнү куппуттар», «федералларга анаан оҥоһуллубут сабыылаах территория үһү» диэн кэпсэтиини бу күннэргэ үгүстүк истэн аастым. Санаабар, ол «Лямпушкалара» ханна эрэ ыраах хоту дойдуга баар быһыылаах диирим. Онтум баара Кэбээйигэ баар эбит.
Үгүһү-элбэҕи утарсар, санаатын аһаҕастык этэр дьокутаат Виктор Федоров Лямпушка өрүс кытылыгар баар иниспиэктэрдэр кордоннарыгар балачча үбү-харчыны куппуттарыттан соһуйан, хайаан да миэстэтигэр баран билсэр санаалааҕын эппитэ. Аны «сыаналаах» тутууга прокуратура хараҕа эмиэ хатанан, РФ Ойуурун кодексын кэһии тахсыбытын бэлиэтээбитэ. Ол курдук паарка территориятыгар «Стройкон» ХЭУо ыалдьыттар хоноллоругар анаан икки дьиэни, баанньыгы, хочуолунайы анал стоянканы туппута.
Бу күннэргэ Ил Түмэн дьокутааттара Уус Бүлүүтээҕи айылҕа пааркатыгар сырыыларын түмүгүнэн, суруналыыстарга пресс-конференция оҥордулар.
«Паарка территориятыгар баар тутуулар өрөспүүбүлүкэ бас билиитигэр киириэхтээхтэр дии саныыбыт. Бу бастатан туран, экологическай туризмы кытары сибээстээх. Иккиһинэн, тутуллубут эбийиэгэ көтүрэр сыыһа дии саныыбын», – диэн Виктор Федоров санаатын тосту уларыппытын туһунан эттэ.
Тутуллубут аата тутуллубут. Ол экологическай турзизмнарын сайыннардахтарына, баҕар, кыра да буоллар, үп-харчы киириэн сөп. Ол эрээри ураты көстүүлээх паарка «Визит-Киинигэр» баай дьоҥҥо эрэ аан аһаҕас буолуо дии саныыбыт.
Анивера АКИМОВА.