Бүддьүөт үлэһиттэрэ ахсынньы ыйдааҕы хамнастарын эһиил олунньуга биирдэ ылаллар, бириэмийэтэ, эбии төлөбүрэ суох хаалар кутталлаахтар диэн сонун соторутааҕыта социальнай ситимнэринэн киэҥник тарҕаммыта.
СӨ Үлэ уонна социальнай сайдыы министиэристибэтэ иһитиннэрэринэн, https://mintrud.sakha.gov.ru/news/front/view/id/3091177 Саха сиригэр 2019 сылга бүддьүөт эйгэтин үлэһиттэрин иннигэр бары социальнай эбэһээтэлистибэ, ол иһигэр хамнас төлөбүрэ толору оҥоһуллуоҕа.
Күн бүгүн бүддьүөт үлэһиттэрэ хамнастарын хойутаабакка ыла олороллор, тэрилтэлэр иэстэрэ суох, ити сыалга төлөнөр харчы хааһынаҕа көрүллүбүтэ.
2019 сыл бэс ыйын 1 күнүттэн үөрэх эйгэтин, наука, култуура үлэһиттэрэ, быраастар, орто уонна алын сүһүөх медицинскэй, социальнай үлэһиттэр үрдэтиллибит хамнастара 2019 сыллаах бүддьүөккэ киирэн турар.
Министиэристибэлэргэ уонна биэдэмистибэлэргэ акылаат үрдүүрэ бигэргэтиллэн, олоххо киириэхтээх.
Онон 2019 сыл бүтүөр диэри бүддьүөт үлэһиттэрэ бары үрдэтиллибит хамнастарын ылыахтаахтар. СӨ бүддьүөтүгэр хамнаһы төлөөһүн – бастатан туран оҥоһуллар сүрүн хайысха диэн бэлиэтээтилэр.
Хамнаһы кэмигэр төлөөбөтөх тэрилтэ салайааччылара Үлэ кодексатын быһыытынан, эппиэтинэскэ тардыллыахтара.
«Саха сирэ» хаһыат, edersaas.ru