Бу икки түһүмэҕинэн ыытыллар үрдээһин 58 тыһыынча кэриҥэ бүддьүөт үлэһиттэрин таарыйыаҕа. Манна үөрэх, наука, социальнай хааччыйыы, култуура эйгэтин үлэһиттэрэ хабыллыахтара.
Бастакы түһүмэҕэ бу сыл алтынньытыттан саҕаламмыта. Учууталлар, иитээччилэр, эбии үөрэхтээһин педагогтара, орто, үрдүк үөрэх кыһаларын маастардара, преподавателлэрэ, научнай үлэһиттэр, быраастар, орто, алын медицинскэй, социальнай эйгэ уонна култуура үлэһиттэрин хамнастара 4,8 бырыһыантан 69,5 бырыһыаҥҥа тиийэ үрдээбитэ. Онно өрөспүүбүлүкэ бүддьүөтүттэн эбии 2,9 миллиард солк. көрүллүбүтэ.
Манна ордук кыра хамнастаах үлэһиттэр киэннэрин үрдэтэр сорук турар. Холобур, санитаркалар хамнастара 69,5% үрдээтэ. Профессиональнай үөрэхтээһин преподавателлэрин, үлэһиттэрин хамнастара — 42,3%, быраастар, медицина атын үлэһиттэрэ, фармацевтар — 32,9%, сиэстэрэлэр — 24,4% үрдээбитэ.
Култуура эйгэтин үлэһиттэрэ – мусуойдар, бибилэтиэкэлэр, тыйаатырдар, култуура кииннэрин үлэһиттэрин хамнастара 4,8%-тан 50,6%-ҥа тиийэ үрдээтэ, ону тэҥэ, 2018 сылга өрөспүүбүлүкэҕэ олохтоммут орто хамнас кээмэйигэр тиэрдиэхтэрэ.
Үрдүк үөрэх эйгэтигэр алтынньыттан 42,3%, 2018 сыл тохсунньутуттан 19,2% үрдүөхтээх. Доруобуйа харыстабылыгар: алтынньыттан — 69,5%, тохсунньуттан — 33,7%.Социальнай хааччыйыы эйгэтигэр 2017 сыл от ыйыттан хамнас 62% үрдээбитэ. 2018 сылга өрөспүүбүлүкэҕэ олохтоммут орто хамнас кээмэйигэр тиийиэхтээх.
2012-2017 сылларга Ил Дархан Егор Борисов бүддьүөт үлэһиттэрин хамнастарын үрдэтэр туһунан кэнсиэпсийэни бигэргэппитэ. Бу докумуон үлэлии турар. Ол чэрчитинэн, хамнаһы үрдэтии иккис түһүмэҕэ 2018 сыл тохсунньутуттан салҕаныа. Сүрүннээн, эбии 1,6-33,7% үрдүүрэ былааннанар.
Ангелина Васильева, “Саха сирэ” хаһыат, edersaas.ru