РФ бэрэсидьиэнин 2012 сыллааҕы “ыам ыйынааҕы” ыйаахтарын 2018 сыллааҕы соруктара туоллулар. Саха сиригэр бүддьүөт үлэһиттэрин 12 категорияларыгар хамнастарын үрдэппиттэрэ. Ол туһунан СӨ үлэҕэ, социальнай сайдыыга миниистирэ Елена Волкова коллегия кэмигэр иһитиннэрдэ.
Былырыын тохсунньуттан бүддьүөт үлэһиттэрин хамнастара үрдээбитэ. Тустаах тэрилтэлэр ону күүскэ хонтуруоллаабыттара, кэтээн көрбүттэрэ. Үлэһиттэр хамнастарын үрдэппэтэх сорох тэрилтэлэри ыстарааптаабыттара.
Ол түмүгэр, 2012 сылы кытта тэҥнээтэххэ, былырыын орто үөрэхтээһин педагогтарын хамнаһа 2 төгүл, оскуолаҕа киириэх иннинээҕи кэм педагогтарын – 2,7 төгүл, быраастар, сиэстэрэлэр, биэлсэрдэр хамнастара – 2,5 төгүл, эбии үөрэхтээһин уонна тулаайах, көрүүтэ-истиитэ суох хаалбыт оҕолордуун үлэлэһэр педагогтар, култуура, каука үлэһиттэрин хамнастара – 3 төгүл, алын медицинскэй персонал – 4 төгүл, үрдүк профессиональнай үөрэхтээһин преподавателлэрин хамнастара 5,4 төгүл үрдээбит.
Бу үүммүт сылга 2018-2024 сс. бүддьүөт тэрилтэлэригэр үлэ төлөбүрүн систиэмэтин тупсарыы кэнсиэпсийэтин бастакы түһүмэҕэ олоххо киириэхтээх. Манна хамнаһы “сааһылааһын”, чуолаан акылаатын үрдэтии, ону тэҥэ, үлэ төһө уустугуттан көрөн, үрдэтии-намтатыы күүтүллэр.
Ангелина ВАСИЛЬЕВА, “Саха сирэ” хаһыат, edersaas.ru
+1
+1
+1
+1
+1
+1
+1