Өрөспүүбүлүкэ бырабыыталыстыбатын бэрэссэдээтэлэ Евгений Чекиҥҥэ ыытыллыбыт мунньахха 2018 уонна 2019-2020 сс. бүддьүөттэрин бырайыага бигэргэннэ. Онуоха бүддьүөт үлэһиттэрин хамнаһын үрдэтэргэ кэлэр сылга 8,9 млрд солк. көрүлүннэ.
edersaas.ru
Үп миниистирэ Валерий Жондоров этэринэн, урукку сылларга бүддьүөт 37 судаарыстыбаннай бырагырааманан тыырыллар буоллаҕына, күн бүгүн 23 бырагыраама чэрчитинэн таҥыллар. Кэлэр 2018 сылга бүддьүөт дохуоттаах чааһа 169 млрд солк., ороскуота 171,1 млрд солк. буолар, оччотугар 1,5 млрд солк. тиийбэтэ сабаҕаланар. Нолуок киириитэ 4 млрд солк. аччыыр буолбут, ол эрээри федерацияттан көмө быһыытынан 43,9 млрд солк., эбэтэр бу ааһан эрэр сыллааҕар 7,3 млрд. солк. элбэх харчы көрүллүөхтээх.
Быйылгы 2017 сылы ыллахха, билигин бүддьүөт дохуоттаах чааһа 186 млрд солк. тэҥ. Бу иһиттэн 15,6 млрд солк. — «РусГидро» тарыып уларыйыытынан көрбүт субсидията. Россия Президенин ыам ыйынааҕы ыйааҕынан, бүддьүөт эйгэтин үлэһиттэрин тустаах категорияларын хамнастарын пуондата 8,9 млрд солк. үрдэтиллэн, бүддьүөт ороскуоттаах чааһа улааппыт. Манна бүддьүөт эйгэтин атын үлэһиттэрин хамнастара 4 % үрдэтиллибитэ эмиэ эбиллибит. 8,6 млрд солк. регионнааҕы инвестбырагыраамалары үбүлээһиҥҥэ анаммыт. Ол иһигэр, тулаайах оҕолору олорор дьиэнэн хааччыйыыга 1 млрд. бэриллибит, судаарыстыба чааһынай бизнеһи кытары кыттыһыытын чэрчитинэн Онкология киинин, оскуолалары уонна социальнай тэрилтэ дьиэлэрин тутууга эмиэ сөптөөх үп көрүллүбүт. Дефицит 1,52 млрд солкуобайынан бигэргэммит. Сыл бүтүүтэ судаарыстыба иэһэ 51,6 млрд буолар, 2018 сылга бу көрдөрүү 800 мөлүйүөнүнэн улаатар чинчилээх. Федеральнай кииҥҥэ бүддьүөт иэһин хаттаан көрүү оҥоһуллуохтаах.
– Барыта 12,4 млрд солк. кээмэйдээх иэһи биһиги үс сыл устата төлүөхтээхпит. Бу болдьох 2024 сылга диэри уһатыллан, атын сиртэн үбү буларга күһэллии намыратылынна уонна иэс улаатыытын тэтимэ кыччатылынна, – диэтэ миниистир Валерий Жондоров.
Быһата, бүддьүөт ыарахан соҕустук тыырыллыбыт. Аҥардас эбии наадыйыыларга 52 млрд ирдэнэр. Хамыыһыйа тугу ордук чорботору быһааран эрэ баран харчыны көрүөхтээх. Билиҥҥитэ 9,1 млрд солк суумалаах сайаапкаҕа сөбүлэҥ бэриллибит. Мунньах түмүгүнэн бүддьүөт бырайыага Ил Түмэҥҥэ ыытылынна, ону дьокутааттар нэдиэлэ бүтүүтүгэр көрүөхтээхтэр.
Раиса Сибирякова, “Саха сирэ” хаһыат, edersaas.ru