Бэс ыйын 1 күнүгэр өрөспүүбүлүкэ Бырабыыталыстыбатын Баһылыга Евгений Чекиҥҥэ ыытыллыбыт оробуочай мунньах бэбиэскэтигэр 2017-2020 сс. бүддьүөт үлэһиттэрин хамнастарын боппуруоһа көрүлүннэ. edersaas.ru
Медицина, наука үлэһиттэрин, үрдүк үөрэх кыһаларын преподавателларын хамнастара үрдэтиллэн, быйыл алтынньы 1 күнүгэр өрөспүүбүлүкэ орто хамнаһын 180 %-ыгар, 2018 сыл тохсунньу 1 күнүгэр 200 %-ыгар тиэрдиллиэхтээх. Онуоха хамнас орто кээмэйэ эмиэ улаатыахтаах. Итини таһынан, алын уонна орто анал үөрэх тэрилтэлэрин преподавателларын итиэннэ производственнай үөрэхтээһин маастардарын, култуура уонна социальнай эйгэ үлэһиттэрин орто дохуоттара хамнас орто таһымыгар тэҥнэһиэхтээх. Маннык сыалы туруорунан, сүбэ мунньах кыттыылаахтара «суол каартатыгар» бигэргэммит хамнас орто таһымын үрдэтэр үбү хайдах хааччыйары дьүүллэстилэр.
Евгений Чекин Россия Президенин ыйааҕын уонна Ил Дархан сорудаҕын толорон, эбии үбү көрөн, бүддьүөт үлэһиттэрин иннилэригэр ылыллыбыт бары эбэһээтэлистибэлэр толору кээмэйинэн толоруллуохтаахтар диэтэ. Тустаах салаалар миниистирдэригэр үлэ төлөбүрүн ситимин тупсарарга итиэннэ бүддьүөт ороскуотун аччатарга сорудахтаата. РФ Үлэҕэ кодексатын 145, 278, 349.5 ыстатыйаларын учуоттаан туран, тэрилтэлэр салайар үлэһиттэрин хамнастарын ааҕыыны кытаанахтык хонтуруоллуурга эттэ.
Раиса СИБИРЯКОВА, “Саха сирэ” хаһыат, edersaas.ru