Бүддьүөт харчыта туохха туттулларын хонтуруоллуохтара

Бөлөххө киир:

Бүгүн Дьокуускай куоракка дойду араас муннуктарыттан муниципальнай уорганнарга үбү ааҕар, хонтуруоллуур балаата бэрэссэдээтэллэрэ, солбуйааччылара XVIII кэмпириэнсийэҕэ муһуннулар. Кинилэр бүддьүөт харчыта тус сыалга туттулларын хайдах хонтуруоллуурга үс күннээх сүбэ мунньахха уопут атастаһыахтара, биир идэлээхтэрин кытта сүбэлэһиэхтэрэ. Үп-харчы аудитын ырытыһыы кэнниттэн тохтобул кэмигэр мин Счетнай балаата бэрэссэдээтэллэрин кытта кэпсэттим.  

edersaas.ru

Ксения Семенова, Сунтаар улууһун Счетнай балаататын бэрэссэдээтэлэ, өрөспүүбүлүкэ Счетнай балааталарын түмсүүлэрин салайааччыта: «Бу форум үс күн буолуоҕа, манна улуустартан уонна 13 эрэгийиэнтэн үбү-харчыны хонтуруоллуур уорган бэрэссэдээтэллэрэ, делегаттар муһуннулар.  XVIII кэмпириэнсийэ Саха сирин киин куоратыгар буола турарыттан олус үөрэбит, биһиги дьоммут ыраах бара сатаабакка, миэстэтигэр элбэҕи билиэхтэрэ-көрүөхтэрэ, үөрэниэхтэрэ. Сүрүннээн, национальнай бырайыактар тула кэпсэтии буолуо», — диэн санаатын үллэһиннэ.

Марина Зиборова, Липецкэй куорат Счетнай балаататын бэрэссэдээтэлэ: «Дьокуускайга баар биир идэлээхтэрбитин кытта уруккуттан билсэбит, бииргэ үлэлэһэбит. Быһаарыныы ылынарга тус бэйэҥ соҕотоҕун буолбакка, атын эрэгийиэҥҥэ баар Счетнай балаата үлэһиттэрин кытта сүбэлэһэр ордук. Биһиги үп-харчы туохха, ханна туттулларын хонтуруоллуубут, олоххо араас буолар, онон үөрүүлээх эрэ түгэҥҥэ сылдьыбаппыт. Улахан үп-харчы эргийэр сиригэр, былаас уорганнарыгар араас быраабы кэһии тахсар. Муниципальнай таһымҥа сири-уоту туһаналлар, дуоһунастарынан куоһурданан, докумуон оҥоттороллор, суолу оҥорууга, дьиэ тутуутугар эмиэ араас боппуруос үөскээччи. Онон стратегическай аудитка көһөн, бэйэни салайыныы уорганнарыгар хас биирдии солкуобай тус сыалга туттулларын ситиһэргэ, ону хайдах тэрийэргэ бу кэмпириэнсийэҕэ сүбэлэһиэхпит», — диэн билиһиннэрдэ.

Анатолий Заиченко, Симферополь куорат уонна Крым Өрөспүүбүлүкэтин Счетнай балаататын бэрэссэдээтэлэ: «Биһиги 2015 сылтан тэриллэн, саҥа үлэлээн эрэбит. Үп-харчы эйгэтигэр аналитическай хонтуруол оҥорорго уопут атастаһа, дьон хайдах үлэлиирин көрө-истэ, биир идэлээхтэрбитин кытта санаа үллэстэ кэллибит. Национальнай бырайыактар үлэҕэ киирдэхтэринэ, эбийиэктэри кэрийэ сылдьан, холобур, суол-иис хайдах оҥоһуллубутун, хаачыстыбатын бэрэбиэркэлиэхпит, экспертиза ыытыахпыт. Былырыын эрэ оҥоһуллубут суолу бырагыраамаҕа иккистээн киллэрбэттэрин тутуһуохпут», — диир кини.

Марианна Тыртыкова, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0