Ыам ыйын 28 күнүгэр бырабыыталыстыба уочараттаах мунньаҕар 2017 с. судаарыстыбаннай бүддьүөт туолуутун бигэргэтэр сокуон барылын көрдүлэр.
edersaas.ru
СӨ үбүн миниистирэ Валерий Жондоров: “Былырыыҥҥы бүддьүөт дохуота 95% туолан, 177,2 млрд. солк., оттон ороскуота 186 млрд. солк. тэҥнэстэ. 2017 с. РФ экономическай сайдыытын министиэристибэтэ дуоллар куурсун 67,4 солк. сабаҕалаан көрөн аахпыта дьиҥ олоххо 58 солк. этэ. Ол айылҕа баайын хостуурга уонна хампаанньа барыыһыттан тутуллар нолуок киириитигэр быһаччы сабыдыаллаата. Бүддьүөт дэписиитин 9 млрд. 80 мөл. солк. СӨ судаарыстыбаннай бүддьүөтүгэр хаалбыт харчынан уонна иэс ылан үбүлээтибит”, — диэн эттэ кини.
Өрөспүүбүлүкэ экономиката тас дойдуга табаардарын таһаарар бырамыысыланнай хампаанньалар төлүүр нолуоктарын кытта ыкса ситимнээх буолан, солкуобай дуолларга куурсуттан улахан тутулуктааҕын миниистир бэлиэтээтэ.
Марианна ТЫРТЫКОВА, «Саха сирэ» хаһыат , edersaas.ru