Бүддьүөт ороскуоттаах чааһын сабыыга өрөспүүбүлүкэ 11 млрд солк. булла. Бу туһунан Ил Дархан э.т. Айсен Николаев “Саха” НКИХ ханаалыгар быһа эфир кэмигэр иһитиннэрдэ.
Санатан эттэххэ, бэс ыйыгар өрөспүүбүлүкэ бүддьүөтүн ороскуоттаах чааһын сабыыга 15 млрд солк. тиийбэтэ биллибитэ. Бу маны сабыы бүддьүөт иһинээҕи хаһаас харчыны сыҕарытан биэрии түмүгүнэн уонна “АЛРОСА” хампаанньаттан кэлэр дивидент көмөтүнэн ситиһиллибит.
“СӨ бырабыыталыстыба бүддьүөт иһинээҕи хаһаас харчыны сыҕарытан биэрэн, бүддьүөт ороскуоттаах чааһын сабыыга 2,5 млрд солк. көрүлүннэ. Ол иһигэр хамнаһы төлөөһүҥҥэ эмиэ. Ону сэргэ “АЛРОСА” хампаанньа уонна РФ бырабыыталыстыбата дивидены төлөөһүҥҥэ саҥа ньыманы оҥорон, улахан көмө буоллулар. Өскөтүн бу иннинэ хампаанньа дивидены сылга биирдэ төлүү олорбут буоллаҕына, билигин сыл аҥардыытыгар биирдиитэ төлүүр буолла. Бу систиэмэни сайын ылынан турабыт”, — диэн бэлиэтиир Айсен Николаев.
Манна даҕатан эттэххэ, өрөспүүбүлүкэ хампаанньаттан дивиденин 2017 с. түмүгүнэн барытын ылан олорор. Сыл түмүгэр 2018 с. сыл аҥардааҕы дивиденин ылыаҕа.
“Биһиги ааҕыыбытынан, 10 млрд солк. курдук эбии үбүлээһини ылыахпыт. Ол эрээри билигин да 3-4 млрд солк. өссө да тиийбэт. Сыл бүтүүтэ оройуоннар уонна улахан хампаанньалар көмөлөрүнэн бу боппуруоһу сабыахпыт дии саныыбын”, — диэн бэлиэтиир Айсен Николаев.
Аграфена КУЗЬМИНА, “Саха сирэ” хаһыат.