Экология министиэристибэтэ сыл устата улуустарынан, куораттарынан дьон айылҕаны, тулалыыр эйгэтин харыстыы үөрэнэригэр туһуламмыт тэрээһиннэри тиһиктээхтик ыытар.
Оннук тэрээһиннэртэн биирдэстэрэ «Бөҕү туһунан хомуйуу 2.0» диэн Дьокуускай куоракка буолбут акция буолар. Манна быйыл 2000 тахса киһи кытынна. Тэрээһин «Араарыллыбыт бөх» волонтерскай хамсааһын көҕүлээһининэн ыытылынна.
Акция кэмигэр пакетынан, куулунан, хоруопканан араас пластигы, кумааҕыны, макулатура арааһын, хаһыаттары, батареялары, люминисцентнай лаампалары аҕалан салгыы оҥорон таһаарыыга туттардылар. Аан бастакытын акция кэмигэр массыына шиналарын, аккумулятордарын туттулар.
Тэрээһин партнердарынан бөхтөн араас бородууксуйаны оҥорон таһаарар тэрилтэлэр буоллулар. Ол курдук, «Эко-партнер» фирмаҕа 350 киилэ пластик уонна 800-чэкэ люминисцентнай лаампалары туттардылар.
Оттон «Вектор» хааччахтаммыт эппиэтинэстээх тэрилэ 4500 киилэ макулатураны ылла. «Чөл сир» инициативнай бөлөх пластигы полимеркумахтаах билиитэлэри оҥорорго ыытта. «Планета Электро» 240 кэриҥэ киилэ батареялары Челябинскайга баар собуокка ыытар. Оттон «Carton Company» 600 кэриҥэ киилэ хортуонканы Благовещенскайга оҥорон таһаарыыга ытта.
Дьэ, бөхпүтүттэн төһөлөөх элбэх саҥа мал-сал, матырыйаал тахсарын көрүҥ. Акция туһата диэн, дьон өйүн-санаатын төрдүттэн уларытар, бөҕү сөпкө харайарга үөрэтэр. Холобур, билигин хас биирдии ыал бөҕүн сөпкө харайар, туттарар буоллаҕына, айылҕабыт төһөлөөх чэпчиэ этэй. Маннык санаалаах дьон күнтэн күн элбээн иһэр.
Волонтерскай хамсааһын уонна кытаанах коммунальнай бөҕү бэрийэр Саха сиринээҕи оператор кыттыһан Дьокуускай хас да кыбаарталыгар бөҕү наардаан хомуйууну саҕалыахтара. Маны таһынан, куорат оскуолаларыгар, үөрэх кыһаларыгар экологическай үөрэтии бырагыраамалара киириэхтэрэ. Салгыы бу үөрэх өрөспүүбүлүкэҕэ тарҕаныаҕа.
Үтүө холобур: Аллараа Бэстээххэ пластиктан тротуар билиитэтин оҥороллор
Билиҥҥи кэмҥэ симэлийбэт бөх – пластик, пакет о.д.а. матырыйаал сатаан хараллыбакка, айылҕаны буортулууруттан аан дойду барыта айманар. Маннык матырыйааллары дьон туһаҕа таһааран иккистээн, үһүстээн араас туһалаах малы-салы оҥоруохтаах. Ол курдук, Аллараа Бэстээххэ пластигы хомуйан, туһаҕа таһаарар собуот үлэлиир. Олохтоох нэһилиэнньэ туттарбыт пластигыттан алдьаммат, кыраҕа бэриммэт бөҕө тротуар билиитэлэрин оҥорон таһаараллар.
Тэрилтэ аата — «Чөл сир» диэн. «Биһиги бытыылкалары, салаппааны, пластик оонньуурдары тутабыт. Маннык оҥорон таһаарыы пуунун Дьокуускайга эмиэ арыйар баҕалаахпыт. ПВХ матырыйаалы уонна полистеролу туппаппыт. Маннык билиитэни оҥорор тэрилтэ Россия үрдүнэн тарбахха баттанар. Кыһыны таах тулуйар, кумахтаах буолан, соччо халтарыйбат», — диэн кэпсиир «Чөл сир» бөлөх чилиэнэ Михаил Охлопков.
Сыахха күҥҥэ 40 кв миэтэрэ тротуар билиитэлэрин оҥорон таһаарыахтарын сөп.
Билиитэ тас көстүүтэ тупсаҕай, араас өҥнөөх буолар, хаачыстыбата да үрдүк таһымнаах. Сыахха оҥоһуллан тахсыбыт бастакы бородууксуйа номнуо атыыга барбыт. Инникитин сыах кыаҕын ыллаҕына тротуар билиитэлэрин нэһилиэнньэ хамаҕатык атыылаһыа диэн эдэр дьон эрэнэр.
Инникитин «Бөҕү туһунан хомуйуу 2.0» курдук хабааннаах акциялар элбэхтик ыытыллыахтара.