«Бүгүн «Бартыһаан» кулуубугар туох эрэ дьикти кэнсиэр буолар үһү. Дьокуускай курдук ыраах сиртэн саастаах дьахталлар үҥкүүлүү кэлбиттэр үһү. Бээ-бээ, хайдаҕа буолла, сыаната да удамыр эбит. Баран көрүөххэйиҥ!» – диэн кэпсэтии соторутааҕыта Сунтаар с. олохтоохторун ортолоругар тахсыбыта. Аныгы кэм сиэринэн, Батсаапка кэлбит биллэриини көрбүттэрэ, бэйэлэрин кыыстара, илиҥҥи үҥкүүнү тарҕатааччы Анастасия Габышева буолан соһуппута даҕаны, үөрдүбүтэ даҕаны.
Надежда ЕГОРОВА, «Саха сирэ» хаһыат, edersaas.ru
Онон, биир кыһыҥҥы киэһэ Дьокуускайтан «Азиза» үҥкүү бөлөҕө салайааччылара Анастасия Габышева-Сыдьаайа «Үҥкүү дьолго кынаттыыр» үбүлүөйдээх уонна илиҥҥи үҥкүүнэн дьарыктаммыта 10 сылын бэлиэтиир кэнсиэригэр күндү ыалдьыт буолбута. Бөлөх «кыргыттара» тохтоло суох толорбут 15 араас үҥкүүлэригэр имигэстэринэн, хамсаныылара ырааһынан эрэ буолбакка, саастарынан сөхтөрбүттэрэ. Ол курдук, Светлана Корнилова (79), Александра Иванова (77), Маргарита Саввинова (77), Нина Ноева (70), Октябрина Трифонова (64), Татьяна Павлуцкая (62), Надежда Ананина (61), Лидия Данилова (60), Ксения Иванова (59) саастаахтар. Кинилэр сааһыран баран, үҥкүүнэн дьарыктаммыттара тохсус сылыгар барбыт. Бэйэлэрэ билинэллэринэн, сорохторо эдэр сылдьан үҥкүүһүт быһыытынан сириллэн, ханнык да ансаамбылга ылыллыбатах кыргыттар эбит. Ону хата, Анастасия Габышева курдук кырдьаҕаһы кытары кырдьаҕас, эдэри кытары эдэр буолар үтүө дьарыктаах дьон баар буолан, туолбатах ыра санааларын олоххо киллэрэ сылдьалларыттан үөрэллэр.
Бэйэлэрин кэмнэригэр араас идэҕэ буспут-хаппыт, оҕолорун, сиэннэрин атахтарыгар туруортаабыт кэрэ, мааны дьахталлар үҥкүүнэн дьарыктанан, доруобуйаларын чөлүгэр түһэрэллэр, олохторун уһаталлар. Бөлөхтөрүн кытары өрөспүүбүлүкэ чугастааҕы улуустарыгар тиийэн, көрөөччүлэри үөрдэллэр, ыһыахтарга кытталлар. Куоракка профилакторийдарга, санаторийдарга, аһымал кэнсиэртэргэ тиийэн, ыарыһахтары доруобай олоххо көҕүлүүллэр, санааларын көтөҕөллөр.
«Мин кинилэри «девочкаларым» диэн ыҥырабын. Улахан дьону кытта үлэлээбитим 12 сыл буолла. Онно кэтээн көрбүппүнэн, киһи хамсана-имсэнэ сырыттаҕына, имигэстик хамсанар кыаҕа төннөр эбит, быһыыта-таһаата тупсар. Дьону хамсата үөрэтэргэ тус ньымалаахпын. Ол барыта элбэх үөрэхтэн уонна кэтээн көрүүттэн төрүттэммитэ. Сыл аайы Москваҕа уонна Питергэ баран, араас учууталга үөрэнэн, уһуйуллан кэлэбин. Дьону кытта үлэлииргэ хайаан да бэйэҥ үүнэ-сайда туруоххун наада. Саҥаны бэйэм эппинэн-хааммынан билэн эрэ баран, дьону үөрэтэбин», – диэн Анастасия Габышева кэпсиир.
«Азизалар» кыһыҥҥы уһун өрөбүллэргэ былааннара элбэх. Репертуардарыгар саҥа үҥкүүлэри киллэрээри, Саҥа дьылга дьоҥҥо үчүгэй настарыанньаны бэлэхтээри бэлэмнэнии түбүгэр сылдьаллар. «Сааспыт ыраатта диэн сытан хаалар санаабыт суох. Үҥкүү, хамсаныы көмөтүнэн олохпутун уһатыахпыт дии. Күннээҕи настырыанньабыт да көтөҕүллэр. Киһи санаа кулута буоларыттан эрэйдэнэр диэн этэллэр дии. Оттон биһиги тэтимнээх үҥкүү кулуттарабыт», – дэһэллэр.
Надежда ЕГОРОВА, «Саха сирэ» хаһыат, edersaas.ru