«Уһук Илин уулуссата» быыстапкаҕа IV Илиҥҥи экономическай форум чэрчитинэн «Азия оҕолоро» I кыһыҥҥы Аан дойдутааҕы оонньуу истиэндэтэ дьон болҕомтотугар таҕыста.
«Аан дойду таһымнаах тэрээһини биһиги киэҥник сырдатыахпытын наада. Күрэхтэһиигэ 20 дойду эбии кыттыһыахтара. 1500 тахса спортсменнар мэтээл туһугар киирсиэхтэрэ», — диэн этэр «Азия оҕолоро» спортивнай оонньуу дириэксийэтин салайааччыта Владимир Максимов.
edersaas.ru
2019 с. олунньу 8-17 күннэригэр Сахалиҥҥа ыытыллар «Азия оҕолоро» интерактивнай көрүҥүн арыйан, ханнык спорт көрүҥнэригэр күрэхтэһии хаһан ханнык спортивнай эбийиэктэргэ ыытылларын киирэн көрүөххэ сөп. Ким баҕалаах биатлон электроннай саатынан ытан көрөр, шорт-трек дуоскатынан хатааһылыыр, хоккей шайбатын боруотаҕа киллэрэр кыахтаах.
Ону таһынан, «Хайа салгына» диэн Уһук Илин биир саамай улахан хайа курортун спортивнай-туристическай киинин презентацията оҥоһулунна. Манна 3D ачыкы кэтэн, кэлэр сезон халандаарын көрүөххэ, бириистээх оонньууга кыттыахха, эрэгийиэн атын туристическай сирдэрин билсиэххэ сөп. Сахалин арыытыгар тиийэн туох саҥаны, интэриэһинэйи көрүөххэ сөбүн виртуальнай айан субу иһигэр киирэн сылдьар курдук кэпсиир, баҕалаах дьону оонньууга ыҥырар. Интерактивнай дуоскаҕа ким баҕарар баҕа санаатын суруйан хаалларыан син.
Марианна Тыртыкова, «Саха сирэ», edersaas.ru