«Азия оҕолорун» тэрээһиннэригэр олимпийскай чөмпүйүөннэр уонна призердар кыттыахтара
От ыйын 28 күнүттэн Владивостокка ыытыллаары турар VII Норуоттар икки ардыларынааҕы «Азия оҕолоро» спортивнай оонньуулар тэрээһиннэригэр олимпийскай чөмпүйүөннэр уонна призердар Лилия Ахаимова, Вера Бирюкова, Дарья Дмитриева, Антон Чупков, Георгий Балакшин, сноубордка аан дойду икки төгүллээх чөмпүйүөнэ Софья Надыршина кыттыыны ылыахтара.
Ааттаах-суоллаах спортсменнар уот эстафетатыгар, оонньуулар үөрүүллээх арыллыыларыгар, наҕараадалааһыннарга кыттыахтара, күрэхтэһиилэри көрүөхтэрэ. Кинилэр бары оҕо сылдьан араас сылларга «Азия оҕолругар» кыттыбыттара, онон оонньуулартан улахан успуорка кынаттаммыт дьон буолаллар.
«Саха сирэ — «Азия оҕолорун» дойдута. Олохпун уонна үлэбин успуорду кытта сибээстээн туран, бу оонньуулар эрэгийиэҥҥэ успуорт сайдыытыгар сабыдыаллаахтарын бэлиэтиэм этэ. Спортсменнарга бу оонньуулар улахан успуорка путевканан буолаллар, миэхэ эмиэ оннук этэ. Маннык улахан тэрээһиҥҥэ кыттыы даҕаны ситиһии уонна бырааһынньык буоллаҕа. Оҕолор бэйэлэрин биир улахан спортивнай дьиэ кэргэнинэн ааҕыналлар, онно хаалыахтарын баҕараллар», — диэн 1996 сыллаах «Азия оҕолорун» кыайыылааҕа, 2008 сыллаах Пекиннээҕи Олимпиада буоксаҕа боруонса призера Георгий Балакшин этэр.
Быйылгы оонньууларга 15 дойдуттан 2000 кэриҥэ спортсмен кыттыыны ылыаҕа.