«Азия оҕолорун» оонньууларыгар Саха сирин хамаандата бастакы мэтээлин ылла

Бүгүн Владивосток куоракка  “Азия оҕолоро” VII сайыҥҥы оонньуулар күрэхтэһиилэрэ саҕаланнылар.

edersaas.ru

Cаха сирин  сүүмэрдэммит хамаандатыгар бастакы мэтээли ууһут Владислав Адасько аҕалла. СИА кэрэспэдьиэнэ иһитиннэрбитинэн, кини 200 миэтэрэҕэ сиһинэн сытан харбааһыҥҥа боруонса мэтээли ылла. Дьокуускай куорат онус кылааһын үөрэнээччитэ Владислав былырыын успуорт маастарын нуорматын толорбута. Кини бу оонньууларга Саҥа дьылтан саҕалаан бэлэмнэнэн барбыта. Эдэр ууһуту  Виктор Гринь уонна Олег Лапшин эрчийэллэр.

Владислав Адаськоны СӨ ИЛ Дархана  Айсен Николаев: “Ис сүрэхпиттэн эҕэрдэлиибин! Дальше-больше” диэн Инстаграм-ханаалыгар эҕэрдэлээтэ. Саха сирин ууһуттара бүгүн хас да көрүҥҥэ, көҥүл стильгэ харбаатылар.

Владислав бэйэтин хамаандатыгар бастакы кыайыыны аҕалбытынан киэн туттарын туһунан эттэ. Манна сыһыаран эттэххэ,  “Азия оҕолоро”   норуоттар икки ардыларынааҕы VII оонньууларга Саха сириттэн   успуорт 18 көрүҥэр 120 спортсмен уонна 50 тириэньэр кыттар.

Надежда ЕГОРОВА, «Саха сирэ», edersaas.ru, Андрей СОРОКИН хаартыскалара