Маны аах Успуорт

«Азия оҕолоро» спортивнай оонньуулар — 2022 сылга

РФ Бэрэсидьиэнэ Владимир Путин 2022 сылга «Азия оҕолоро» норуоттар икки ардыларынааҕы VII спортивнай оонньуулары Владивостокка тэрийэн ыытары бэлэмнэниини хааччыйарга соруйда. Бу туһунан СИА иһитиннэрэр.
«РФ Бырабыыталыстыбата Приморье кыраайын дьаһалтатын кытта бииргэ, 2022 сылга Владивостокка «Азия оҕолоро» норуоттар икки ардыларынааҕы VII спортивнай оонньуулары ыытарга бэлэмнэниини хааччыйарга», — диэн физическэй култуураны уонна успуорду сайыннарыы сэбиэтин мунньаҕын түмүгүнэн ылыллыбыт сорудахха этиллэр. Бу боппуруоһунан дакылааты бэрэсидьиэн быйыл ахсынньы 10 күнүгэр уонна эһиил балаҕан ыйын 20 күнүгэр диэри күүтэр.

«Азия оҕолоро» норуоттар икки ардыларынааҕы спортивнай оонньуулар Саха сиригэр 1996 сыллаахха аныгы олимпийскай хамсааһын сүүс сылын көрсө тэриллибитэ. Бу Арассыыйаҕа норуоттар икки ардыларынааҕы олимпийскай кэмитиэт уонна ЮНЕСКО көрүүтүгэр баар соҕотох бырайыак. 2016 сыллаахха эрэгийиэн бырабыыталыстыбата Арассыыйа куораттарыгар уонна атын дойдуларга бу күрэхтэһиини тэрийэн ыыталларыгар боломуочуйаны биэрэр туһунан быһаарыыны ылбыта.

Санатан эттэххэ, СӨ Ил Дархана Айсен Николаев сайыҥҥы «Азия оҕолоро» оонньуулары аан бастаан тэриллибит дойдутугар үгэс курдук ыытыахха сөптөөҕүн туһунан  санаатын эрдэ этэн турар.

0
0