Маны аах Успуорт

«Азия оҕолоро»: оонньуулар кэнниттэн дьоруойдар санаалара

Владислав Адасько, Дьокуускай куорат М. И. Кершенгольц аатынан оскуола тохсус кылааһын үөрэнээччитэ, харбааһыҥҥа боруонса мэтээллээх:

— Харбааһынынан бастакы кылаастан дьарыктанабын. Тириэньэрдэрим Виктория Евгеньевна Гринь уонна Олег Витальевич Лапшин харбыырга үөрэппиттэрэ. Дьарыкпыт үтүө түмүктээх буолла. Ситиһиибиттэн олус соһуйдум, үөрүүм муҥура суох! Туруоруммут сыалбытын ситистибит. Успуорт туһата элбэх, бар дьону успуордунан дьарык-
танарга ыҥырабын. Мэтээлбин Сахам сиригэр, тириэньэрдэрбэр, төрөппүттэрбэр, доҕотторбор аныыбын!

Аксинья Панова, Дьокуускай куорат Табаҕа оскуолатын тохсус кылааһын үөрэнээччитэ, 100 миэтэрэҕэ мэһэйдээх сүүрүүгэ кыһыл көмүс мэтээллээх:

— Иккис кылаастан Дьокуускай 1‑кы №-дээх оҕо успуордун оскуолатыгар тириэньэр Петр Александрович Нечаевка дьарыктанабын. Кыһыннары-сайыннары күн аайы дьүөгэбин Настя Татарниковалыын оптуобуһунан айаннаан кэлэбит. Чэпчэки атлетика миэхэ иккис дьиэм кэриэтэ. Тириэньэрим сүбэтинэн, кылгас сиргэ сүүрүүлэртэн мэһэйдээх сүүрүүгэ көспүтүм. Маҥнай утаа ыарырҕатарым, хардыыларым сөп түбэспэттэр этэ. Өр сыралаһыы кэнниттэн дьэ табыллыбыта. Сөбүлээбитим. Сүүмэрдиир күрэхтэһиигэ маастарга хандьыдааты толорбутум. Хайдах былааннаабыппытынан күрэхтэстим. Күрэхтэһии сүрдээх тыҥааһыннаахтык ааста. Барыллааһын сүүрүүнү кыайбытым. Финалга фальстартан сэрэнэммин, старпар кыратык олорон хаалбытым. Онтон утарсааччыларбын эккирэппитим. Иккис, үһүс барьердарга сиппитим уонна тохсус, онус барьердарга куотан киирэн барбытым. Инникитин успуорт маастарын нуорматын толорорго үлэлиэхпит.

Эрхан Куличкин, Дьокуускай 3‑с №-дээх оҕо успуордун оскуолатын иитиллээччитэ, көҥүл тустууга 38 киилэҕэ боруонса мэтээллээх:

— Узбекистан уолугар хоттордум. Бэйэм тустуубунан тустубатым, кини салайыытыгар киирэн биэрдим. Ол иһин хоттордум. Бастакы миэстэ буолуохпун баҕарбытым даҕаны кыаллыбата. Узбек уола үчүгэйдик тустар эбит. Тутуспуппутугар, илиитигэр күүһэ биллэр этэ. Мин бэйэм тустуубар илии баайсааччыбын, онтон туора атахха киирэбин. Үһүс
миэстэбэр үөрдүм. Билигин күүстээх буолар курдук өссө дьарыктаныахпын наада. Иннибэр Уһук Илин, Арассыыйа күрэхтэһиилэрэ бааллар. Олимпийскай чөмпүйүөн буолар баҕалаахпын. Күүскэ эрчиллэммин сыалбын ситиһиэхтээхпин.

Роман Кириллин, Сунтаар оскуолатын ахсыс кылааһын үөрэнээччитэ, көҥүл тустууга 44 киилэҕэ боруонса мэтээллээх:

— Бастакы кылаастан тустабын. Тириэньэрдэрим — Павел Степанович Павлов уонна Станислав Григорьевич Яковлев. Павел Пинигин турнирын кыайбытым, Уһук Илиҥҥэ иккис буолбутум, өрөспүүбүлүкэҕэ хаста даҕаны бастаабытым. Онтон Заболоцкай турнирыгар бастааммын, бу бастакы улахан күрэхтэ-
һиибэр — “Азия оҕолоругар” кэлэн туһуннум. Бастакы миэстэни ылар санаалаах этим, ол эрээри кыра тиийбэтэ. Иккитэ атахтаттым уонна “накаакка” эргиттэрэн кэбистим. Хайдах эрэ үчүгэйдик арыллан тустубатым дии санаатым. Үһүс миэстэбинэн син астынабын. Биир-биир үрдэллэри дабайаммын, олимпийскай чөмпүйүөн буолуохпун баҕарабын. Ити туруоруммут сыалбын-сорукпун толоруом диэн бэйэбэр эрэллээхпин.

Айаал Гуляев, Уус Алдан улууһун Уһун Күөл оскуолатын ахсыс кылааһын үөрэнээччитэ, мас тардыһыыга 50 киилэҕэ кыһыл көмүс мэтээллээх:

— Бастакы миэстэни ылар сыаллаах-соруктаах кэлбитим. Киирсиилэр наһаа үчүгэйдик аастылар. Хаһыытаан-ыһыытаан киирэн, тоҕута тардан, эниэргийэ бөҕөтө! Маҥнайгы киирсиибэр Узбекистан уолун кыратык ыарырҕаппытым. “Тягата” күүстээх баҕайы этэ. Онтон Приморскай кыраай уолаттарын кыайталааммын бастаатым. Утарсааччыларым үчүгэйдэр, мөлтөхтөр диэбэккин. Күүскэ дьарыктаммыттара биллэр, кыранан кыайбатылар. “Туора охсуу”, “күлүүс” уонна “прямой тяга” ньымаларынан ылаттаатым. Албаскар киллэрэн кыайдаххына олох сүрдээҕин үөрэҕин ээ! Маннык улахан таһымнаах күрэхтэһиигэ кытта илигим. Мас тардыһыы мин идэтийэн дьарыктанар көрүҥүм буолар. Бырахпаккабын, улаатыахпар диэри илдьэ сылдьыам. Аны “Манчаары оонньууларыгар” кыттар сыаллаахпын.

Екатерина Алексеева, Дьокуускай куорат 17‑с №-дээх оскуолатын тохсус кылааһын үөрэнээччитэ, бинтиэпкэнэн ытыыга кыһыл көмүс мэтээллээх:

— Буулдьанан ытыынан бэһис сылбын дьарыктанабын. Тириэньэрим — Иванна Андриановна Жегусова. Барыллаан ытыыларга бастаабытым, онтон финалга Армения кыыһын 16:4 ахсааҥҥа кыайбытым. Ытыым аайы “десяткаларга” түһэртээтим. Буулдьанан ытыы көрүҥэр киһи холку буолуохтаах, ыгылыйыа суохтаах. Бу көрүҥ тус олоххо даҕаны көмөтө элбэх, мээнэ кыыһыра сылдьыбаккын. Мин бэйэм майгыбар-сигилибэр сөп түбэһэр көрүҥ. 2020 сыллаах Токиотааҕы Олимпиадаҕа Масников, Каменскай, Бацаракшина ытааччылардаах Арассыыйа хамаандата кыайбыта. Мин бу дьону холобур оҥостобун. Кыайыыбын тириэньэрбэр уонна миэхэ ыалдьыбыт дьоммор аныыбын.

Баһылай Посельскай.

Мария Васильева (СИА) хаартыската.

1
0
Telegram Whatsapp