Бүгүн Соҕуруу Сахалинскай куоракка ыытыллар “Азия оҕолоро” бастакы кыһыҥҥы оонньууларга Саха сирин хайыһардьыттара биир үрүҥ көмүс уонна икки боруонса мэтээллэри ылары ситистилэр.
“Доҕордоһуу эстэпиэтэтэ” диэн холбоһуктаах хамаандалар куоталаһыыларыгар Алдантан Иван Заворотных Казахстан уонна Корея хайыһардьыттарын, оттон Владислав Парфёновпыт Москва, Уһук Илиҥҥи уокурук спортсменнарын кытта сүүрэннэр иккис, үһүс көрдөрүүлэннилэр.
Кыргыттарга Саха сирин сүүмэрдэммит хамаандатын чилиэнэ Анастасия Ткаченко Казахстан, Москва кыргыттарын кытта үһүс миэстэҕэ таҕыста.
Онон, Саха сирин хамаандата “Азия оҕолоро” оонньууларга барыта биэс мэтээллэннэ. Бу иннинэ үрүҥ көмүс мэтээллэри биатлоҥҥа Николай Максимов, хоккейга Иван Чаишвили ылан тураллар.
Хамаанданан түмүккэ эдэр спортсменнарбыт Москва, Соҕуруу Корея, Сибиир, Сахалин-1, Урал, Казахстан, Япония, Уһук Илин, Армения, Татарстан хамаандаларын кэннилэриттэн уон биирис миэстэҕэ иһэллэр.
Роман ПОПОВ, «Саха сирэ» хаһыат, edersaas.ru
Андрей Сорокин (СИА) хаартыскалара