«Азия оҕолоро» норуоттар икки ардыларынааҕы оонньуулар 2024 сылга Саха сиригэр ыытыллара күүтүллэр. Бу туһунан кулун тутар 9 күнүгэр СӨ Ил Дархана Айсен Николаев ыйааҕа тахсыбыта.
«Азия оҕолоро» оонньуулар 2024 сылга Саха сиригэр үрдүк таһымнаахтык ыытыллыаҕа диэн эрэнэбит» — диэтэ Айсен Николаев эттэ.
СӨ Физическэй култуураҕа уонна успуорка миниистирэ Леонид Спиридонов иһитиннэрбитинэн, оонньуу бырагырааматыгар 21 успуорт көрүҥэ киирбит. Ол иһигэр эбии кикбоксинг, сурдо-борьба, истиэндэбэй ытыы, дуобат уонна саахымат киирбиттэр. Саха сирэ оонньууну тэрийээччи буоларын быһыытынан, бу успуорт көрүҥнэригэр барытыгар кыттыаҕа. Быһа холоон, өрөспүүбүлүкэ сүүмэрдэммит хамаандатыгар 600 спортсмен уонна тириэньэрдэр киириэхтэрэ. Сотору кэминэн оонньуулары тэрийэр кэмитиэт састааба биллиэҕэ.
Оонньуулар оҕо успуордун көҕүлүүр, сайыннарар уонна Азия-Чуумпу акыйаан эрэгийиэнин норуоттарын икки ардыларыгар сибээһи күүһүрдэр, Олимпийскай хамсааһыны көҕүлүүр соруктаах ыытыллар.
Бэлиэтээн эттэххэ, оонньуулары киин куораппытыгар ыытыы туһунан сөбүлэһиигэ тохсунньу 27 күнүгэр СӨ Ил Дархана Айсен Николаев уонна “Азия оҕолоро” норуоттар икки ардыларынааҕы кэмитиэт бэрэсидьиэнэ Владимир Максимов илии баттаспыттара.
Ульяна ЗАХАРОВА.