Бэс ыйын 8 күнүгэр Дьокуускайга “Өрөгөй” спорт киинин түһүлгэтигэр саха төрүт оонньуутугар — хапсаҕайга “Азия Куубага” диэн улахан турнир буолаары турар. Бу күрэскэ бөҕөстөр хамаандаларынан 63, 75 уонна 95 киилэҕэ диэри ыйааһыннарга күүстэрин холоһуохтара.
Хас биирдии Азия норуотугар төрүт тустуулаахтар. Холобура, биһиэхэ, сахаларга, хапсаҕай эбит буоллаҕына, тувиннарга – хуреш, бүрээттэргэ – бухэ барилдан, монголларга – бох, кэриэйдэргэ – сирым о.д.а. “Азия Куубага” хапсаҕай көрүҥэр ыытыллыаҕа. Ол курдук, быйылгы түһүлгэҕэ Саха сирин бастыҥ хапсаҕайдьыттарын сэргэ, Соҕуруу Корея, Бурятия, Тыва уонна Монголия бөҕөстөрө ыҥырыллан кэлиэхтэрэ.
Быраабыла уларыйда
“Азия Куубагын” тэрийээччилэр Дьулустаан Захаров, Толлуман Барашков итиэннэ Батас Верховцев көрөөччү интэриэһин тардар инниттэн, күрэхтэһии быраабылатын саха биллиилээх бөҕөстөрө – олимпийскай чөмпүйүөн Павел Пинигин, хапсаҕай бочуоттаах маастардара Василий Стручков-Абый Бааска, Андрей Яковлев, күрэс солбуллубат кылаабынай судьуйата Петр Бурцев кыттыыларынан чочуйан оҥорбуттарын этэллэр.
Ол курдук, төрүт хапсаҕайга сэрэтии бэриллэр эбит буоллаҕына, буолаары турар турнирга көбүөртэн таһаардахха сэрэтии бэриллэр диэн уларыттылар. Аны үс мүнүүтэ иһигэр кыайыылаах биллибэтэҕинэ, хапсаҕайдьыттар систэһэн быһаарсыахтара. Ол эбэтэр, “Азия Куубагар” сэрэтиинэн кыайыы тахсыбат диэн, хайаан даҕаны албас оҥоһуллан, утарсааччытын суулларбыт бөҕөс кыайыылаах тахсыаҕа. Оттон хамаандалар киирсиилэрэ “стенка на стенку” оонньуу форматынан барыаҕа.
Кыттааччылар билиннилэр
Саха сирин хамаандаларын састаабыгар өрөспүүбүлүкэтээҕи хапсаҕай чөмпүйэнээттэрин, турнирдарын кыайыылаахтара, призердара киирдилэр. Саха төрүт тустуутун күүстээх бэрэстэбиитэллэрэ илин-кэлин түсүһүөхтэрэ. Оттон ыҥырыллыбыт хамаандалар истэригэр бэйэлэрин дойдуларын, өрөспүүбүлүкэлэрин тустуутун эмиэ бастыҥ ааттаахтара-суоллаахтара бааллар.
Саха сириттэн түөрт хамаанда турда. Ол курдук, быйылгы Петр Алексеев кэриэһигэр ыытыллыбыт хапсаҕайга өрөспүүбүлүкэ чөмпүйэнээтин түмүгүнэн үс бастакы миэстэни ылбыт улуустар – Үөһээ Бүлүү, Таатта, Сунтаар хамаандалара кытталлар. Ону тэҥэ, өрөспүүбүлүкэ хомуур хамаандата тэрилиннэ.
Саха сирин хомуур хамаандата:
63 киилэҕэ — Владислав ЛЕВЧИКОВ;
75 киилэҕэ — Прокопий ПЕТРОВ;
95 киилэҕэ — Николай НИКОЛАЕВ.
Үөһээ Бүлүү улууһун хамаандата:
63 киилэҕэ — Егор ИВАНОВ;
75 киилэҕэ — Тимур НИКОЛАЕВ;
95 киилэҕэ — Платон САВВИНОВ.
Таатта улууһун хамаандата:
63 киилэҕэ — Ньургун ТИСТЯХОВ;
75 киилэҕэ — Игнатий АНДРОСОВ;
95 киилэҕэ — Александр ХАЛЫЕВ.
Сунтаар улууһун хамаандата:
63 киилэҕэ — Игорь ПЕТРОВ;
75 киилэҕэ — Айсен КИЛИБЕЕВ;
95 киилэҕэ — Павел ДОРОФЕЕВ.
Бурятия хамаандата:
63 киилэҕэ — Алексей МОНТОЕВ;
75 киилэҕэ — Сангади УЛЬЗЕТУЕВ;
95 киилэҕэ — Баясхалан БАЗАРОВ.
Тыва хамаандата:
63 киилэҕэ — Айдыс МОНГУШ;
75 киилэҕэ — Аржаан ОНДАР;
95 киилэҕэ — Кайгаал-Оол ОНДАР.
Соҕуруу Корея хамаандата:
63 киилэҕэ — JANG JUN HWAN;
75 киилэҕэ — JUNG WOO SUK;
95 киилэҕэ — KIM SEUNG HYEON.
Монголия хамаандата:
63 киилэҕэ — Марал-эрдэнэ ЧИМЭДДОРЖ;
75 киилэҕэ — Алтаннаран РЕНЧИНДОРЖ;
95 киилэҕэ — Нурлан КАМЕЙХАН.
Көрөргүт курдук, үс ыйааһыҥҥа биирдии хапсаҕайдьыт баар. Аҕыс хамаанданы икки бөлөххө араартаан туһуннарыахтара. Бэйэлэрин бөлөхтөрүгэр кыайбыт хамаандалар финалга киирсиэхтэрэ, оттон иккис буолбуттар боруонса мэтээл иһин күрэхтэһиэхтэрэ. Кыайыылаах хамаанданы тэрийээччилэр 300 тыһыынча солкуобай уу харчынан наҕараадалыахтара. Иккис – 150 тыһыынча солкуобай, үһүс 90 тыһыынча солкуобайы тутуохтара.
Саҥа көлүөнэ дьоно саха төрүт оонньуутун пропагандалааһыҥҥа ылсыбыттарыттан үөрэбит эрэ, инникитин маннык тэрээһиннэр дьон-сэргэ киэҥ сэҥээриитин ылан, саҥалыы тыыны киллэрэ турдуннар диэн баҕарабыт.
Айтана Аммосова,
«Саха сирэ» хаһыат, edersaas.ru