“Азия Хотун” аартыктары арыйар…

Бөлөххө киир:

Саха литературатын историятыгар аан бастаан английскайдыы тылынан бэчээттэнэн тахсыбыт “Азия Хотун” поэтическай хомуурунньугун саха норуодунай поэта Наталья Харлампьева Саҥа Дьыл иннинэ дойдутугар, Дьокуускайга сүрэхтээтэ. Оттон сэтинньигэ кинигэ Англияҕа, Лондоҥҥа сүрэхтэммитин туһунан биһиги «Саха сирэ» хаһыат ааҕааччыларыгар иһитиннэрбиппит.

Национальнай библиотека историческай саалатыгар тобус толору мустубут  суруйааччылар, учуонайдар, литератураны таптааччылар, устудьуоннар, ыччаттар, аны билигин английскай тыллаах икки миллиартан тахса ааҕааччы саха омугун – бу саамай хоту олорор түүр норуотун литературатын, поэзиятын, кини култууратын, үгэстэрин билсэр кыахтанна диэтилэр. Бу кинигэ Лондоҥҥа күн сирин көрүүтүн биир дириҥ суолтата итиннэ, бу саха дьонун эрэ буолбатах, бу Россия норуоттарын барыбыт үөрүүбүт, диэн бэлиэтээтилэр. Бу күн, биллэн турар, элбэх хоһоон ааҕылынна, ырыа да ылланна. Наталья Ивановна кинигэтин Лондоҥҥа сүрэхтэниитин билиһиннэрдэ, видео-киинэни көрдөрдө. Саха литературатын сайдыытын, поэзия туһунан истиҥ-иһирэх кэпсэтии таҕыста.

Өссө биирдэ санатан эттэххэ, Н.И.Харлампьева бу айымньытынан Лондоҥҥа “Открытая Евразия 2015” норуоттар икки ардыларынааҕы литературнай фестиваль лауреата буолан, анал бириэмийэ ылан, английскайдыы бэчээттэнэр кыахтаммыта.

“Азия Хотун” английскайдыы тахсан, норуодунай поэт Наталья Харлампьева биир идэлээхтэригэр, эдэр суруйааччыларга  суол тэлээччи буолла. Ол курдук, “Открытая Евразия 2016” норуоттар икки ардыларынааҕы литературнай фестивальга оҕолорго аналлаах бастыҥ айымньы иһин Мария Шевель аатынан бириэмийэ лауреатынан саха суруйааччыта Евдокия Иринцеева-Огдо буолла. Онон, саха литературатыгар аан дойду аартыктара арылыннар-арыллан иһэллэр!

Татьяна МАРКОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0