Дьокуускай куоракка Автодорожнай уулусса 19 нүөмэригэр тиийбит киһи хараҕа саҥа үлэҕэ киирээри турар дьиэҕэ быраҕыллар. Саҥа дьиэ таһыгар үлэлии сылдьар оробуочай Юрий Дмитриев бу дьиэ балаҕан ыйыгар киириэхтээҕин туһунан этэр.
“Бу дьиэҕэ кыбартыыралара хайдаҕый? — диир Өлүөхүмэттэн сылдьар Ньукулай Ньукулаайабыс уонна бу дьиэ аттыгар сыһыары акылаата түһэн баран, салгыы тутуллубатах иккис уочарат диэки хомойбуттуу көрөр. Кини 2017 сыллаахха дуогабар түһэрсиэҕиттэн кураанахха ый аайы “Сбербааҥҥа” кирэдьиит төлүү олорорун туһунан муҥатыйда. Саатар, “Сбербаан” тутуллубатах дьиэҕэ төлөппөтө буоллар диир. Дьэ, кырдьык, бу “Монолит-строй” дьиэтин иккис уочарата иһэ истээх дьыала эбит.
Дьон оҕолорун дьиэлээри, бэйэлэрэ толору хааччыллыылаах усулуобуйаҕа олороору, кыбартыыра ылаары дуогабардаспыттар уонна баччааҥҥа диэри кураанахха төлүү олороллор. Кинилэртэн үксүлэрэ биэнсийэлээхтэр, элбэх оҕолоохтор, огдооболор, сүрүннээн тыа сирин дьоно бааллар.
Александр, Зоя Герасимовтар, үс оскуолаҕа үөрэнэр оҕолоох ыал, Мэҥэ Хаҥалас, Майа с. олохтоохторо:
— 2017 сыллаахха Дьокуускайга оҕолорбут үөрэнэ киирэллэригэр диэн өлүүлэһэн тутууга «Сбербаан» ипэтиэкэтин нөҥүө 1.800 тыһыынча солкуобай суумаҕа ипэтиэкэҕэ киирсэн, риэлтор өҥөтүнэн «Монолит-строй» тутуу тэрилтэтин таламмыт, Автодорожнай уулусса 19-гар 16 этээстээх дьиэҕэ иккис уочаратыгар устуудьуйа-кыбартыыраҕа киирсибиппит. Ыларбыт саҕана саас дьиэбит тутулла турар курдуга. Күһүн кэлэн «Монолит-строй» тэрилтэ моҥкуруукка баран эрэрин туһунан сурах-садьык тарҕаммыта. Тэрилтэ генеральнай дириэктэрэ Егоров Г.В, салайааччы Захарова Л.Г кыттыылаах хаста да мунньахтар ыытыллыбыттара. Быһата, салгыы тэрилтэ харчыта суох буолан, тутуу тохтуура биллибитэ. Биһиги элбэх оҕолоох тыа сирин ыала бүддьүөт тэрилтэтигэр үлэлиибит. Биирбит хамнаһа ипэтиэкэни төлүүрүнэн эрэ муҥурданар, онон биир киһи хамнаһыгар биэс киһи иитиллэн олоробут.
Киһи хайдах даҕаны өйүгэр-санаатыгар батарбат дьыалата. Саха дьонун бэйэбит биир дойдулаахпыт Егоров Г.В албыннаан өлүүлэһэн тутуу угаайытыгар киллэрбитин. Ааспыт сылга албыннаппыттарга анаан өрөспүүбүлүкэҕэ анал пуонда тэриллибитэ. Онуоха толуйуу харчыта төлөнөрүгэр эрэммиппит эрээри, аны сирин боппуруоһугар кэлэн иҥнибитэ. Икки кыра оҕолоох огдообо хаалбыт ийэ Ольга Местникова көҕүлүүр бөлөҕү тэрийэн, СӨ Тутуу Министиэристибэтиттэн, пуондаттан тустаах үлэһиттэри мунньан хаста да төхтүрүйэн мунньахтаан, хас эмэ сылы быһа кэтэспит харчыбытын төнүннэрэргэ туруулаһаллар эрээри, боппуруос оннуттан хамсаабат. РФ Бэрэсидьиэнэ В.В. Путиҥҥа, Ил Дархаммыт А.С.Николаевка, СӨ Бырабыыталыстыбатыгар сурук суруйан ыыппыттара.
Кураанахха – кирэдьиит хабалатыгар
В. Б. Окорокова:
— Былааннаммыт улахан албыҥҥа киирэн биэрбиппит наһаа кыһыылаах. Кырдьаҕас дьон сана дьиэҕэ олорон сынньаныахпыт диэбит тиһэх эрэлбит эһиннэ. Аны төһөлөөх эдэр дьон бастакы дьиэлэрин ылар үөрүүлэрэ түҥнэстибитэ буолуой? Төһөлөөх ньиэрбэ алдьанна, доруобуйа сүттэ. Аны ипэтиэкэ улахан харчытын төлүүр эрэйигэр сылдьабыт. Мин төлүүрүм өссө да 7 сыл хаалла.. Федераллар биһиэхэ, Монолит өлүүлэһээччилэригэр, анаабыт харчытын биэрэ охсоллоругар баҕарабыт. Талбыт мээрбит С.В.Авксентьева биһиги балаһыанньабытын билэрэ дуу?
Ольга (араспаанньатын ыйбаппар көрдөстө):
— Хайдах итинник биир сиргэ үрүт үөһээ элбэх этээстээх дьиэ туттарарга көҥүл ылбыттарын киhи сатаан өйдөөбөт. Аны страховкабынан Проминстрахтарга докумуоннарбын ыыппытым, ол докумуон, бу тиийбэт диэн төттөрү ыытан уhатан испиттэрэ, билигин отой да эмиэ моҥкуруут барбыттар дииллэр. Ол страховкаларга ыытарбытыгар эмиэ харчы бөҕөтүн нотариустарга төлөөбүппүт таах мээнэ халлааҥҥа. Кыhыыта диэн баара-суоҕа 3 сылга барбыт дииллэр дириэктэри.
Мария Чагдинская, Сунтаар улууһа:
— Кыра уолбут Дьокуускайга 1 хостоох эргэ мас дьиэҕэ үс оҕотун кытта 5 буолан олороллор. Ол иһин, «Монолит-строй» диэн тэрилтэ дьиэ тутарыгар судаарыстыбаттан өйөбүллээх диэнин сөбүлээн, өлүүлэһэн, «Сбербаантан» 2.5 мөлүйүөн солкуобайы уган дьиэлэммит курдук санаммыппыт. Дьиэбит тутулларын кэргэним төлөпүөннэһэн, куоракка бардаҕына көрсүтэлээн, хонтуруоллуу сылдьыбыта. “Хайа, хойутаары гыммыккыт дии”, —диэтэҕинэ мэлдьи: “Ээ, начаас тутуллуо, матырыйаалбыт хойутаата эбэтэр кэлиэхтээх, тутааччыларбыт докумуоннара сатаммакка хойутаатылар эҥин диэн хоруйдууллар этэ. Билигин кураанахха ый аайы 37800 курдугу төлүү олоробут. Ипэтиэкэбитин эрэ төлүүр сыалтан үлэлии сатыыбыт даҕаны, саастаах дьону хаһан баҕарар ууратар кыахтаахтар. Киһи кыһыйыах, саатар, Проминстрахтан страховкабытын юриспыт А.Н.Васильев көмөтүнэн икки сылы быһа туруорса сатаатыбыт да, кыайан ылбатыбыт. Кыһалҕалаахтар туруорсууларын Герасимовтар этиилэринэн түмүктүүбүт: — Биһиги СӨ Ил Дархана Айсен Николаевтан Автодорожнай 19- гар тутуллан иһэн тохтообут дьиэ иккис уочаратын албыннаппыт дьонун сир икки халлаан икки ардыгар хаалларбакка, сирин боппуруоһун быһааран, дьоҥҥо харчыларын төнүннэрэргитигэр көмөлөһөрүгэр көрдөһөбүт.
Сири араарыы тиһэҕэр тиэрдиллиэҕэ
Наталья Чусовская, “Өлүүлэһэн тутууга кыттар гражданнар бырааптарын көмүскүүргэ Саха Өрөспүүбүлүкэтин пуондата” кэмиэрчэскэйэ суох унитарнай тэрилтэ генеральнай дириэктэрэ:
— “Монолит-строй” иккис уочаратынан эмсэҕэлээбит дьон бырааптара Өлүүлэһэн туттарааччылар бырааптарын көмүскүүр федеральнай пуонда нөҥүө чөлүгэр түһэриллэр. 2019 сыл алтынньы ыйга сөбүлэһии түһэрсиллэн, бу эбийиэк онно киирбитэ. Ол эрээри төлөбүр эбэтэр эбийиэги ситэри тутуу туһунан быһаарыыны сир учаастагын сыаналааһын суоҕуттан ылынар кыахтара суох. Сир сыанатын оҥорорго бастаан сир учаастагын араарыахха наада, тоҕо диэтэххэ, биир сир учаастагар икки эбийиэк (1-кы уонна 2-с уочарат) киирэ сылдьар. Маныаха сир учаастагын араарыы 1 –кы уочаракка эмиэ наада, бу дьиэни тутуу “Автодорожная 19” дьиэ тутар кэпэрэтиибин өлүүлэһэн тутааччыларынан түмүктэнэр эрэр.
Сир учаастагын араарыы куораты тутуу докумуонугар уларытыылары киллэриини, межевание былаанын оҥорууну, сир учаастагын кыраныыссатын уларыйыытын, кадастр учуотугар туруоруунан сибээстээн ыарахаттардаах. Билигин сир учаастагын кыраныыссатын уларытыыларын регистрациялааһын түһүмэҕэр сылдьабыт. Тоҕо диэтэххэ, 1-кы уочараттаах эбийиэк балконунан учаастак кыраныыссатын таһыгар тахсыбыт. Онон бу түһүмэххэ кадастр учуотугар туруорууга Росреестр уоргана биһиэхэ сыһыары сытар сир учаастагын кыраныыссатыгар кэһиилэр баалларын булбута. Бүгүҥҥү туругунан хара ааныттан сир учаастагын араарыы процедуратын арыаллыыр, көмөлөһөр уонна хонтуруоллуур , өлүүлэһэн туттарааччылары көмүскүүр өрөспүүбүлүкэтээҕи пуонда үлэтин түмүгэр Росреестр уорганын кытта бу балаһыанньаттан тахсар суолу тобуллубут. Араарыы процедурата тиһэҕэр тиэрдиллиэҕэ, конкурснай управляющай сир учаастагын сыаналааһыны ыытыаҕа уонна сибидиэнньэни федеральнай пуондаҕа “Монолит-строй” эбийиэгин иккис уочаратыгар быһаарыы ылынарга биэриэҕэ.
Пуонда аадырыһа: Дьокуускай к., Орджоникидзе уул, 33/1 дь, төл: (4112)31-90-39, e-mail: regfond14.ru, https://www.regfond14.ru
Бэлэмнээтэ Женни СТРЮКОВА
Хаартыска: пуонда тиксэрдэ