Саҥа сылга саҥа соруктар туруоруллан, былырыыҥҥы үлэ түмүктэрин таһаарарга тоҕоостоох кэм үүннэ. Ааспыт нэдиэлэ бүтүүтэ Дьокуускай куорат Дууматын бэрэссэдээтэлэ, “Биир ньыгыл Арассыыйа” баартыйаттан Автодорожнай уокурук дьокутаата Альберт Семенов быыбардааччыларын иннигэр сыл устата ыыппыт үлэтин отчуоттаата.
Туһааннаах уокурукка Автодорожнай уонна Сайсары олохтоохторо киирэллэр. Бу уокурукка хас да уонунан тыһыынча киһи да олордор, санитарнай ирдэбил быһыытынан, мунньахха 50-ча эрэ киһи муһунна. Онон үгүс киһи дьиэлэригэр олорон видео-сибээһинэн кыттан, долгутар ыйытыыларыгар хоруй ыллылар.
Альберт Семенов ааспыт сылга Автодорожнай уонна Сайсары уокуруктарыгар Саха политиэхиньиичэскэй лиссиэй 218 миэстэҕэ анаан тутуллубут эбии эбийиэгэр, 3-c уонна 20-с нүөмэрдээх оскуолаларга хапытаалынай өрөмүөн ыытыллыбытын туһунан иһитиннэрдэ. Оҕо ахсаана элбээн, билигин уһуйаанынан хабыллыы боппуруоһа куоракка ордук сытыытык турар. Онон уокуруктар дьокутааттара бу үлэҕэ күүскэ үлэлэһэн, уһуйааннарга эбии миэстэлэр аһылыннылар. Оскуола иннинээҕи үөрэхтээһиҥҥэ эбии бөлөхтөрү аһарга “Прометей” микро-оройуоҥҥа эбийиэктэр атыылаһыллыбыттар.
Дьокутаат “Куттала суох уонна хаачыстыбалаах айан суоллара” национальнай бырайыагы олоххо киллэрии боппуруоһугар тохтоон, ааспыт сылга киин куоракка уопсайа отучча эбийиэккэ үлэ ыытыллыбытын кэпсээтэ. Оттон Автодорожнай уонна Сайсары уокуруктарыгар, ол иһигэр Воинскай уонна Кеша Алексеев аатынан уулуссаларга хапытаалынай өрөмүөн ыытыллыбыт. Итиэннэ Уокуруктааҕы суолга (Окружное шоссе), “Три сосны” микро-оройуоҥҥа киирии суол, Лонгинов, Петровскай уулуссалара, “Гимеиҥҥэ” эргиир суол өрөмүөннэниллибиттэр. Бу уулуссаларга уһун кэмҥэ өрөмүөн, саҥардыы үлэтэ ыытыллыбакка турбута. Национальнай бырайыакка киирэннэр, тутуу, өрөмүөн үлэтэ түргэтээтэ.
Туһааннаах уокуруктарга иккилии мэндиэмэннээх мас дьиэ элбэх. Ол курдук, Сайсары уокуругар элбэх кыбартыыралаах түөрт дьиэҕэ хапытаалынай өрөмүөн ыытыллыбыт. Биэс дьиэ хоруобуйатын, 68 дьиэ ититэр ситимнэрин, 18 дьиэ уотунан хааччыйар ситимнэрин уларыппыттар, өрөмүөннээбиттэр.
Дуума бэрэссэдээтэлэ Ил Дархан Айсен Николаев Ил Түмэҥҥэ Анал этиитигэр Дьокуускай куорат сайдыытын сүрүн хайысхаларын, ол иһигэр Кангаласска “Суперкампуһу”, Үүнэр көлүөнэ пааркатын, бөҕү таҥастыыр ыстаансыйаны, саҥа полигону тутуу итиэннэ “Былыргы куорат-2” бырайыагы олоххо киллэрии туһунан эппитин бэлиэтээн эттэ.
Отчуот кэмигэр Автодорожнай уонна Сайсары олохтоохторо дьокутаакка араас хабааннаах ыйытыылары биэрдилэр. Ол курдук, Сайсарыга тутуллуохтаах Култуура сынньалаҥ киинин тутуутун, хаарбах туруктаах дьиэлэртэн көһөрүү, суоллары тутуу, хомунаалынай сулууспалар үлэлэрин, бэйдиэ сылдьар ыттар кыһалҕаларын тула ыйыталастылар.
Мунньах түмүгэр олохтоохтор куорат сайдыытыгар, дьокутааттар үлэлэригэр туһааннаан араас этиилэри киллэрдилэр. Сайсары уокуругун бэтэрээннэрин сэбиэтин бэрэссэдээтэлэ Николай Егоров кырдьаҕастар ааттарыттан Дуума дьокутааттарыгар итиэннэ чуолаан Альберт Семеновка махталын тириэртэ. “Эһиги ааспыт сыллааҕы үлэҕитин “туйгунан” сыаналыыбын. Инникитин даҕаны биһиэхэ өрүү көмөлөһө туруоххут диэн бүк эрэллээхпин. Арай ити Култуура сынньалаҥ киинин тутуута түргэтиирэ буоллар диэн баҕа санаалаахпын”, — диэн бэтэрээн эбэн эттэ.
Отчуот кэмигэр үгүс ыйытыы киирдэ. Ол гынан баран, бириэмэ ыгымынан, үгүс киһи хоруйу ылбата. Инньэ гынан, ыйытыылар, этиилэр барыта боротокуолга киллэрилиннилэр.
edersaas.ru
Хаартыска СИА