Арассыыйаҕа коронавируһу утары эмтэри оҥорон таһааран эрэллэр. Ол эрээри, бу эмтэр сыаналара ыараханынан сөхтөрдүлэр.
Холобур, “Р-Фарм” хампаанньа оҥорон таһаарбыт “Коронавир” диэн эмэ 50 табылыаккатын сыаната 11 550 солкуобайдаах, “Промомед” хампаанньа 40 табылыаккалаах “Арепливир” эмэ 12 320 солкуобайдаах.
Федеральнай антимонопольнай сулууспа «Арепливир» сыаната тоҕо ыараханын быһаараары, бэрэбиэркэ ыыта сылдьар. Оттон «Промомед» хампаанньаҕа, бу эми оҥорууга 600 мөлүйүөн кэриҥэ солкуобайы бараабыттарынан сыаната ыараханын быһаараллар. «Арепливир» судаарыстыба хонтуруолугар суох, тоҕо диэтэххэ, олоххо суолталаах эмтэр испииһэктэригэр киирэ илик.
Соторутааҕыта “Авифавир” диэн эми таһаардылар. Бу эмп сыаната 8 тыһыынча солкуобайдаах.
— Коронавируһу утары эмтэр сыаналара олус ыарахан. Ол иһин биһиги арыый удамыр сыананы олохтоотубут. Ол эбэтэр, “Арифавир” сыаната атыттардааҕар 30%-нан чэпчэки. Олоххо суолталаах эмтэр испииһэктэригэр киллэрдэхтэринэ, баҕар бу эмп сыаната өссө түһүөҕэ, — диэн Арассыыйатааҕы быһа инвестиция пуондатын салайар Кирилл Дмитриев иһитиннэрдэ.
“Авифавир” РФ доруобуйа харыстабылын министиэристибэтигэр регистрацияны өссө ыам ыйыгар ааспыта, ол эрээри аптекаларга саҥа таҕыста. “Авифавир” эмтиир бэссэстибэтэ фавипиравир диэн ааттаах.
Санатар буоллахха, кытайдар эмиэ аан бастаан фавипиравирдаах эми оҥорон таһаарбыттара. Коронавируһу эмтиир эмтэргэ бу бэссэстибэ барыларыгар кэриэтэ баар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн