Саха сирин баһылыга Айсен Николаев уонна Салгын тырааныспарын федеральнай агентствотын (Росавиация) салайааччытын солбуйааччы Дмитрий Ядров ахсынньы 7 күнүгэр, оробуочай көрсүһүүгэ, туох туһунан кэпсэттилэр?
Сүрүн болҕомто эрэгийиэҥҥэ авиация сайдыытыгар уонна аэропуортары саҥардыыга уурулунна.
Айсен Николаев киэҥ сирдээх-уоттаах Саха сиригэр авиация сылы эргиччи хааччыйар тырааныспар көрүҥүнэн буоларын бэлиэтээтэ.
Ил Дархан 2020 сылга өрөспүүбүлүкэҕэ Нерюнгри, Өлүөхүмэ, Эдьигээн аэропуортарын комплексыгар сөмөлүөт түһэр-тахсар балаһаларын тутууга уонна саҥардыыга үлэ ыытыллыбытын эттэ. 2021 сылга Үөһээ Бүлүү комплексын саҥардыы түмүктэниэҕэ. Мииринэй куоракка “АЛРОСА” ПАУо өйөбүлүнэн саҥа аэровокзалы уонна искусственнай бүрүөһүннээх түһэр-тахсар балаһаны оҥорууну тутуу ыытыллыаҕа.
Саха сирин Ил Дархана Айсен Николаевы кытта көрсүһүү түмүгэр Росавиация салайааччытын солбуйааччы Дмитрий Ядров эрэгийиэҥҥэ аэропуорт комплекстарын тутууга уонна саҥардыыга үлэ былаан быһыытынан, кыраапыктан хаалыыта суох ыытылларын бэлиэтээтэ.
”Дьокуускай аэропуордун көтөр-олордор балаһатын саҥардыыны кытта сибээстээх боппуруоска тохтоотоххо, кырдьык, бүгүн маны олоххо киллэрии былааннаммыт кыраапыгыттан таҕыстыбыт. Бүгүн бырайыактыыр тэрилтэлэргэ уонна сакаасчыт-тутааччыга бу сыл ахсынньы 15 күнүгэр диэри уу ситимин тардыыга сөбүлэһиллибит быһаарыы ылынарга сорук турда. Ону тэҥэ “Дьокуускай” аэропуордун 2021 сылга реконструкция ыытыллар кэмигэр үлэтин — тустаах балаһа 1650 миэтэрэҕэ кылгыахтаах кэмигэр үлэтин торумнаатыбыт”, — диэн бэлиэтээтэ кини.
2024 сылга диэри Саха сиригэр 39,4 млрд солкуобай суумалаах 16 аэропуорт комплексын саҥардыахтара. Билигин Росавиацияны кытта 2030 сылга диэри 40 млрд лимииттээх саҥардыы былааныгар 10 аэропуорт комплексын эбии киллэрии боппуруоһун быһаарсаллар.
Саха Өрөспүүбүлүкэтин Ил Дарханын уона Саха Өрөспүүбүлүкэтин Бырабыыталыстыбатын пресс-сулууспата
Андрей Сорокин түһэриитэ
Бэлэмнээтэ Женни Стрюкова